Astrum IT akademiyasida Prezident Tech Award xakatoni boʻlib oʻtadi

13-15 oktyabr kunlari Astrum IT akademiyasida President Tech Award tanlovi doirasida xakaton oʻtkaziladi.

Xakaton ishtirokchilari quyidagi yoʻnalishlardan biri boʻyicha loyihalar ustida ishlaydi:

• Sunʼiy intellekt texnologiyalari — murakkab muammolarni hal qilish uchun SIʼdan foydalanadigan innovatsion yechimlar;
• Taʼlimda raqamli texnologiyalar — oʻquv jarayonini takomillashtirish va uni yanada qulayroq qilishga imkon beradigan mahsulotlar va xizmatlar;
• Sogʻliqni saqlashda raqamli texnologiyalar — raqamli yechimlar orqali insonlarning salomatligi va hayotini yaxshilashga yordam beradigan loyihalar;
• Tadbirkorlik va moliyaviy texnologiyalar — biznes jarayonlari va moliyaviy texnologiyalarni takomillashtirish bilan bogʻliq gʻoyalar;
• Kiberxavfsizlik sohasidagi texnologiyalar — tarmoqdagi xavfsizlikni taʼminlash uchun innovatsion yechimlar.

Loyihalar ekspertlar tomonidan bir necha mezonlar bo'yicha baholanadi:

• Taklif etilayotgan loyihaning dolzarbligi;
• Loyiha natijalarga erishish mumkinligi;
• Loyihaning potensial raqobatdosh ustunliklari;
• Bozorda mahsulot yoki xizmatga boʻlgan talab;
• Loyihaning yakunlanganligi;
• Jamoaning imkoniyatlarini baholash;
• Texnik amalga oshirilganligi.

Xakaton gʻolibi $100,000 miqdoridagi grantga ega boʻladi, bu esa gʻoyani haqiqatga aylantirishga yordam beradi. Bundan tashqari, musobaqa yakunida gʻolibni taqdirlash marosimi boʻlib oʻtadigan ICT Week 2023 tadbiriga taklifnoma oluvchi eng yaxshi 10 ta loyiha aniqlanadi.

Eslatib oʻtamiz, arizalarni qabul qilish 1-maydan 1-sentyabrgacha davom etdi. Ushbu davr mobaynida 170 dan ortiq jamoani tashkil etgan 650 dan ortiq kishi xakatonda qatnashish uchun roʻyxatdan oʻtgan.