Dunyoning yetakchi murabbiylari O‘zbekistonlik talabalarga ICPC musobaqasiga tayyorgarlik ko‘rishda yordam beradi

IT Park Uzbekistan biznesni rivojlantirish bo‘yicha direktori Jahongir Radjabov va “IT Park University” direktori Bahodir Ayupov boshchiligidagi O‘zbekiston delegatsiyasi Bokuda bo‘lib o‘tgan “ICPC” tadbirlarida ishtirok etdi va olimpiada rahbariyati bilan uchrashuv o‘tkazdi. Muzokaralarda “ICPC” prezidentlari Matvey Kazakov va Bill Poucher, shuningdek, tashkilotning boshqa vakillari ishtirok etdi. Uchrashuv davomida talabalar jamoalarini tayyorlash bo‘yicha qo‘shma dasturlarni yo‘lga qo‘yish va 2027-yilgi “ICPC” finalini O‘zbekistonda o‘tkazish imkoniyatlari muhokama qilindi.

ICPC (International Collegiate Programming Contest) — talabalar o‘rtasida dasturlash bo‘yicha eng yirik va nufuzli olimpiadalardan biri hisoblanadi. Unda har yili dunyoning 100 dan ortiq mamlakatidan o‘n minglab talabalar ishtirok etib, yetakchi universitetlarni taqdim etadilar. Olimpiada bir necha bosqichda o‘tkaziladi: dastlab mahalliy va mintaqaviy saralash, so‘ngra jahon finali. “ICPC” olimpiadasida ishtirok etish talabalarga texnologiya va moliya sohasidagi yirik xalqaro kompaniyalarda amaliyot o‘tash va ishlash imkoniyatini beradi, g‘oliblar esa professional hamjamiyat tomonidan e’tirof etilib, tanlovning global homiylaridan sovrinlar olish imkoniyatiga ega bo‘ladilar. Final bosqichlari an’anaviy ravishda dunyoning yetakchi maydonlarida o‘tkazilib, rekruterlar va investorlar uchun jozibador nuqtaga aylanadi.

Uchrashuv davomida talabalarni tayyorlashga alohida e’tibor qaratildi. Iqtisodiyot oliy maktabi (HSE), Belarus davlat universiteti (BSU) va boshqa yetakchi universitetlar murabbiylari bilan uchrashuvlar o‘tkazildi. O‘zbekistonlik talabalarning ushbu oliy o‘quv yurtlari talabalari bilan birgalikda mashg‘ulotlar o‘tkazishi, jumladan, o‘quv yig‘inlarini tashkil etish bo‘yicha kelishuvga erishildi.

Bundan tashqari, sport dasturlash bo‘yicha xorijiy murabbiylarni jalb qilishga kelishib olindi. Ulardan biri, olimpiadalarning sobiq ishtirokchisi va sovrindori, O‘zbekistonning bir nechta eng kuchli jamoalarini tayyorlashda ishtirok etadi. Tajribasi kamroq jamoalar uchun sport dasturlashni rivojlantirish va talabalarni xalqaro darajadagi musobaqalarga tizimli tayyorlashga qaratilgan alohida mashg‘ulot rejasi tuzildi.

Shuningdek, “Huawei” vakillari bilan uchrashuv bo‘lib o‘tdi. Ular O‘zbekistonda dasturlash bo‘yicha bir nechta olimpiadalar o‘tkazish va mamlakat talabalari uchun amaliyotlar tashkil etishga qiziqish bildirishdi.

Uchrashuv yakunida tomonlar 2027-yilgi “ICPC” finalini O‘zbekistonda o‘tkazish imkoniyatlarini muhokama qildilar. Delegatsiya Toshkent va Samarqand shaharlari infratuzilmasini taqdim etib, mamlakatning xalqaro darajadagi tadbirni o‘tkazishga tayyorligini ta’kidladi. “ICPC” vakillari, o‘z navbatida, tanishuv sessiyasini o‘tkazib, finalni tashkil etish talablari va standartlarini taqdim etdilar. Bu esa O‘zbekiston tomoniga musobaqani o‘tkazishning tashkiliy va texnik jihatlari haqida to‘liqroq tushuncha berdi.

“ICPC” bilan hamkorlik mamlakatda IT-ta’limni rivojlantirish uchun yangi imkoniyatlar yaratadi. O‘quv-mashg‘ulot yig‘inlari, xalqaro murabbiylarni jalb qilish va tajriba almashish bo‘yicha kelishuvlar talabalar jamoalarini tayyorlashni kuchaytiradi, yosh dasturchilar hamjamiyatini shakllantiradi va ularning jahon miqyosidagi raqobatbardoshligini oshiradi.