IT Park Cyber Cup 2025: turnir finalchilari aniqlandi

25–28-avgust kunlari Raqamli texnologiyalar vazirligi va IT Park Uzbekistan tomonidan tashkil etilgan “IT Park Cyber Cup 2025” turniri o‘tkazilmoqda. Turnirga “UPGrade” kompaniyasi homiylik qilmoqda. Musobaqa doirasida ikkita yo‘nalish — “CS2” va “Dota 2” bo‘yicha o‘yinlar o‘tkaziladi. Dastlabki ikki kun davomida saralash va yarim final o‘yinlari bo‘lib o‘tdi, ularning natijalariga ko‘ra dastlabki finalchilar aniqlandi.

IT Park Cyber Cup — IT Park rezidentlari uchun jamoaviy ishlashni rivojlantirish, tajriba almashish va IT-muhitda kibersportni ommalashtirishga qaratilgan kiberturnir. Turnirni har yili o‘tkazish rejalashtirilgan.

Bu yilgi “CS2” turnirida 21 ta jamoa ishtirok etdi. “Dota 2” yo‘nalishida esa 8 ta jamoa qatnashdi. “CS2” finaliga “UZINFOCOM” va “Qualqore” jamoalari chiqdi, “Dota 2” finalida esa “MAROQAND” va “UZINFOCOM” jamoalari bellashadi.

Yakuniy o‘yinlar va taqdirlash marosimi 28-avgust kuni Raqamli texnologiyalar vazirligining Kongress zalida bo‘lib o‘tadi. Zaldagi tomoshabinlar uchun “UPGrade” hamkoridan sovg‘alar o‘yini o‘tkaziladi!

📆 Jadval:

• 12:00 – jamoalar yig‘ilishi

• 12:40 – tadbirning ochilishi, IT Park biznesni rivojlantirish bo‘yicha direktori Jahongir Rajabovning qutlov so‘zi

• 13:00 – Dota 2 finali

• ~16:00 – tanaffus: CS2 jamoalarini sozlash + tomoshabinlar uchun o‘yinlar

• ~16:30 – CS2 finali

• ~19:30 – taqdirlash marosimi

“IT Park Cyber Cup” turnirining o‘tkazilishi IT Park Uzbekistan rezidentlar hamjamiyatini mustahkamlash, kompaniyalar o‘rtasidagi ichki aloqalarni rivojlantirish va IT sohasida kasbiy o‘sish madaniyatini qo‘llab-quvvatlashga yordam beradi.