“IT Park Korea” Koreya IT-bozorida O‘zbekistonning taniqligini oshirishni davom ettirmoqda

Seuldagi IT Park Uzbekistan vakolatxonasi O‘zbekistonni istiqbolli IT-hab sifatida targ‘ib qilish orqali xalqaro hamkorlikni faol rivojlantirmoqda. Janubiy Koreyaga tashrif davomida O‘zbekistonda autsorsing, qo‘shma loyihalar va biznesni kengaytirish bilan qiziqayotgan yetakchi texnologiya kompaniyalari bilan uchrashuvlar o‘tkazildi.

Koreya IT-kompaniyalari bilan muzokaralar

Inpro bilan uchrashuv

Birinchi uchrashuv “Inpro” kompaniyasi bosh direktori Choy Sin Xyok bilan bo‘lib o‘tdi. Muzokaralar chog‘ida O‘zbekistonda ofis ochish uchun yaratilgan imkoniyatlar, soliq imtiyozlari, dasturchilarning maosh darajasi, shuningdek, Xorazm va Qoraqalpog‘iston kabi hududlardagi IT-infratuzilmasi holati muhokama qilindi.

Kompaniya O‘zbekiston salohiyati va kadrlar zaxirasini o‘rganishdan manfaatdor bo‘lib, biznes ekotizimi bilan batafsil tanishish uchun 2-8 mart kunlari Toshkentga tashrif buyurishni rejalashtirmoqda.

Kompaniya haqida: “Inpro” 2015-yilda tashkil etilgan bo‘lib, qishloq xo‘jaligi va chorvachilik uchun IT va AI yechimlarini ishlab chiqish bilan shug‘ullanadi.

WhyBiz

“WhyBiz” bosh direktori Chon Sin Bek bilan muzokaralar doirasida hamkorlik istiqbollari va kompaniyaning O‘zbekiston bozoriga kirish imkoniyatlari muhokama qilindi.

Chon Sin Bek mamlakatning IT-mutaxassislarini jalb qilish va O‘zbekiston kompaniyalari bilan hamkorlik qilishdan manfaatdorligini bildirdi. Kompaniya bozor va infratuzilmani batafsil o‘rganish uchun Toshkentga tashrif buyurishni ko‘zda tutmoqda.

Kompaniya haqida: “WhyBiz” 2021-yilda tashkil etilgan bo‘lib, qishloq xo‘jaligi va sanoat korxonalari uchun IT-yechimlarni ishlab chiqadi.

Uplex Soft

“Uplex Soft” kompaniyasi bosh direktori Kim Byong Sop bilan uchrashuv o‘tkazildi. U shuningdek Koreya aqlli zavodlar uchun yechimlar assotsiatsiyasini boshqaradi. Suhbat chog‘ida IT-autsorsing istiqbollari, o‘zbekistonlik mutaxassislarni jalb qilish va hamkorlikni yanada rivojlantirish masalalari ko‘rib chiqildi.

Uchrashuv yakunida bosh direktor kompaniyaning O‘zbekistondagi faoliyatini qayta tiklash va dasturchilar jamoasini yollash niyatini bildirdi. Shuningdek, hamkorlik aloqalarini o‘rnatish va qo‘shma loyihalar imkoniyatlarini o‘rganish uchun Koreya IT-kompaniyalarining Toshkentga tashrifini uyushtirish to‘g‘risida qaror qabul qilindi.

Kompaniya haqida: “Uplex Soft” IT-yechimlar, bulutli texnologiyalar va sun’iy intellektni ishlab chiqish bilan shug‘ullanadi. Kompaniya 2010-yilda tashkil etilgan bo‘lib, 2024-yildagi daromadi 8,2 million dollarni tashkil etgan.

SKonec

VR-o‘yinlarining yetakchi ishlab chiqaruvchisi — “SKonec” kompaniyasi bilan birinchi tanishuv uchrashuvi bo‘lib o‘tdi. “Proxy Planet” orqali IT Park bilan tanish bo‘lgan kompaniya vakillari O‘zbekistonning salohiyati va virtual reallik sohasidagi hamkorlik imkoniyatlariga chuqur qiziqish bildirdilar.

Muhokama chog‘ida “SKonec” mahalliy bozorni o‘rganish va kadrlar salohiyatini baholash niyatini bildirdi. Malakali mutaxassislar soni yetarli bo‘lsa, kompaniya loyihalarni autsorsingga topshirish imkoniyatini ko‘rib chiqadi. Agar bozor mutaxassislarni qo‘shimcha tayyorlashni talab qilsa, “SKonec” hamkorlar bilan birgalikda o‘z buyurtmalarini amalga oshirish uchun kadrlar salohiyatini rivojlantirish strategiyasini ishlab chiqishga tayyor.

Kompaniya haqida: “SKonec” VR-o‘yinlarini ishlab chiqish bilan shug‘ullanadi, 2002-yilda tashkil etilgan, xodimlar soni — 81 nafar.

Aitron va TakenSoft: O‘zbekiston bozoriga kirish uchun ikkinchi imkoniyat

“Aitron” va “TakenSoft” vakillari bilan uchrashuv o‘tkazilib, unda kompaniyalarning O‘zbekiston bozoriga kirish istiqbollari muhokama qilindi. Asosiy e’tibor kadrlar salohiyati va ishlab chiqish xarajatlarini optimallashtirish masalalariga qaratildi. Kompaniyalar autsorsingga qiziqish bildirmoqda va mutaxassislarni tanlash uchun rasmiy so‘rov yuborishni rejalashtirmoqda.

Kompaniyalar haqida: Ikkalasi ham IT-yechimlari, Metaverse va AI texnologiyalariga ixtisoslashgan. 2012-yilda tashkil etilgan.

Dream Idea Soft va Sphere AX: kengayishga qiziqish

Tegu shahrida “Dream Idea Soft” va “Sphere AX” vakillari bilan muzokaralar o‘tkazildi. Uchrashuv doirasida “Dream Idea Soft” kompaniyasining O‘zbekiston orqali yangi bozorlarga chiqish imkoniyatlari muhokama qilindi. Bundan tashqari, “Sphere AX” kompaniyasi O‘zbekistonda mutaxassislarni jalb qilish orqali biznesni kengaytirishga ham qiziqish bildirdi. Kadrlar tayyorlash, mahalliy bozor salohiyati va hamkorlikning mumkin bo‘lgan shakllariga alohida e’tibor qaratildi.

Kompaniyalar haqida: “Dream Idea Soft” o‘yinlarni ishlab chiqish bilan shug‘ullanadi (2017-yilda tashkil etilgan, xodimlar soni — 121 kishi). “Sphere AX” sun’iy intellekt yechimlari va kontent yaratishga ixtisoslashgan (2008-yilda tashkil etilgan, xodimlar soni — 143 kishi, 2024-yildagi daromadi — 25 million dollar).

HADA: “Aqlli” qishloq xo‘jaligi uchun IT-yechimlar

“HADA” kompaniyasi vakillari bilan uchrashuv o‘tkazilib, unda Koreyada kadrlar tanqisligi sababli o‘zbekistonlik mutaxassislarni jalb qilish masalalari muhokama qilindi. IT Park Korea vakili Nodirbek Berdiqobilov qishloq xo‘jaligini raqamlashtirish faol rivojlanayotgan Xorazm va Qashqadaryoda ofis ochish imkoniyatini ko‘rib chiqishni taklif etdi. Kompaniya ushbu yo‘nalishga qiziqish bildirdi va hududlarni o‘rganish uchun O‘zbekistonga tashrif buyurish niyatini ma’lum qildi.

Kompaniya haqida: “HADA” kompaniyasi “aqlli” fermalar uchun IT-yechimlarni ishlab chiqish bilan shug‘ullanadi. 2012-yilda tashkil etilgan.

Assotsiatsiyalar bilan hamkorlik va memorandumlar

Telecommunications Technology Association

“Telecommunications Technology Association” vakillari bilan uchrashuv o‘tkazildi. Unda O‘zbekistonga videomateriallar va dasturiy yechimlarni autsorsing qilish sohasidagi hamkorlik imkoniyatlari muhokama etildi. Mahalliy IT-xizmatlar sifati, kadrlar salohiyati va infratuzilma imkoniyatlariga alohida e’tibor qaratildi.

Uyushma O‘zbekiston bozorini o‘rganishga qiziqish bildirdi va IT Park Uzbekistan’ni o‘z ishtirokchilariga taqdim etishni rejalashtirmoqda. Yaqin kelajakda tomonlar hamkorlikning mumkin bo‘lgan shakllarini, jumladan, tajriba almashish, qo‘shma tadbirlar o‘tkazish va tajriba loyihalarini amalga oshirish uchun hamkorlarni izlashni ko‘rib chiqadilar.

KIIIC va Korea AI Association o‘rtasidagi memorandum

Muzokaralar doirasida “KIIIC” (IT Park Uzbekistan hamkori va O‘zbek-Koreya IT-biznes alyansining hammuassisi) hamda “Korea AI Association” o‘rtasida kelishuv imzolandi. Mazkur kelishuv Koreya sun’iy intellekt kompaniyalarini O‘zbekistonga jalb qilish va O‘zbekiston IT-kompaniyalarining autsorsing buyurtmalarini olishi uchun shart-sharoitlar yaratishga qaratilgan.

Hamkorlikning asosiy yo‘nalishlari quyidagilarni o‘z ichiga oladi:

• Koreya sun’iy intellekt kompaniyalarini O‘zbekiston bozorini o‘rganishda va hamkorlar topishda qo‘llab-quvvatlash.
• Qo‘shma tadbirlar, shu jumladan biznes missiyalari va ekspert maslahatlarini tashkil etish.
• Autsorsing imkoniyatlarini kengaytirish va xalqaro texnologik loyihalarni rivojlantirish.

Tashrif yakunlari: istiqbollar va keyingi qadamlar

IT Park vakilining Koreya kompaniyalari bilan muzokaralari hamkorlikka bo‘lgan yuqori qiziqishni tasdiqladi. Muhokama qilingan tashabbuslar, jumladan, hududlarda ofislar ochish rejalari sheriklikni rivojlantirishga o‘zaro tayyorlikdan dalolat beradi. Belgilangan loyihalarning amalga oshirilishi O‘zbekiston IT-ekotizimini mustahkamlashda muhim qadam bo‘lib, sohaning o‘sishiga va yangi ish o‘rinlarini yaratishga xizmat qiladi.