IT Park University’ga kirish imtihonlari boshlanmoqda

IT Park University mart oyida kirish imtihonlari boshlanishini eʼlon qildi. Imtihon matematika va ingliz tili testlarini oʻz ichiga oladi. Amaldagi IELTS sertifikati (5.0 ball yoki undan yuqori) yoki uning ekvivalenti abituriyentni ushbu testdan ozod qiladi.

ITPU – bu IT Park va EPAM kompaniyasi tomonidan yaratilgan yuqori texnologiyali raqamli universitet hisoblanadi. OTM dasturi IT sohasida zamonaviy va talabi yuqori boʻlgan kasblarni egallashga qaratilgan boʻlib, oʻquv dasturlari EPAMʼning eng yaxshi oʻquv yechimlariga asoslangan.

Bakalavriatda tahsil olish uch yil davom etadi (General Track), uning yakunida “Dasturiy injiniring” mutaxassisligi boʻyicha davlat diplomi beriladi.  Universitetda maʼruzalar ingliz tilida olib boriladi (taʼlimning birinchi yilida ingliz tilini oʻrganishga eʼtibor beriladi).

Gibrid, asosan onlayn format butun mamlakat bo‘ylab talabalarga poytaxtga ko‘chib kelmasdan turib mutaxassislik olish imkonini beradi. Shuningdek, ular amaliyotchi IT-mutaxassislarning Toshkent va viloyatlarda o‘tkaziladigan oflayn vorkshoplariga kirish imkoniyatiga ega bo‘ladilar.

Dastlabki uch semestr bazaviy IT fanlarini oʻz ichiga oladi, 4-semestrda esa eng yaxshi talabalar ilgʻor oʻquv dasturiga (Advanced Track) oʻtish imkoniyatiga ega boʻladilar. Ular qoʻshimcha ravishda avtomatlashtirilgan test, Front-end yoki Back-end-dasturlashni oʻrganadilar. Profilga oid fanlar butun dunyo boʻylab EPAMʼning amaliyotchi ekspertlari tomonidan oʻqitiladi, shuning uchun maʼruzalar onlayn tarzda oʻtkaziladi.

Eng yaxshi talabalar Yevropa va AQShda amaliyot o‘taydilar, shuningdek, EPAM kompaniyasidan ish takliflarini oladilar.

Bir necha bosqichda OTM talabasi boʻlishingiz mumkin:

• my.itpu.uz veb-saytidagi shaxsiy kabinetingizga ariza yuborish;
• shaxsiy kabinetingizda kirish imtihonlariga roʻyxatdan oʻtish;
• imtihonlarni muvaffaqiyatli topshirish;
• shartnomani imzolash va toʻlash;
• roʻyxatdan oʻtish buyrugʻini olish va oʻqishni boshlash.

Taʼlim narxi – yiliga 15 million so‘mni tashkil qiladi.

Veb-saytda siz ITPU haqida batafsil maʼlumot olishingiz va kirish imtihoniga roʻyxatdan oʻtishingiz mumkin.

Veb-sayt: itpu.uz
Instagram: @itpu_uz
Facebook: fb.com/itpu.uz
Telegram kanali: t.me/itpu_uz