IT Park Uzbekistan Janubiy Koreya delegatsiyasini qabul qildi

IT Park Uzbekistan bosh qarorgohida xizmatlar eksportini rivojlantirish bo‘yicha direktor Mahliyo Muksinova Janubiy Koreyaning Kyonsanbuk-do provinsiyasi hukumati va Kyongbuk texnoparki vakillari bilan amaliy uchrashuv o‘tkazdi. Tashrif startaplarni qo‘llab-quvvatlash, xalqaro texnologiyalar almashinuvi va raqamli tashabbuslarni rivojlantirish sohasidagi hamkorlik imkoniyatlarini o‘rganish maqsadida amalga oshirildi.

Uchrashuvda Kyonsanbuk-do hukumati Mintaqaviy rivojlanish siyosati byurosi bosh direktori Chon Son Xyon, Xorijiy hamjamiyatlar bo‘limi boshlig‘i Chon Sun Yol, ushbu bo‘lim vakili Li Xan Sol, shuningdek, Kyongbuk texnoparki bosh direktori Xa In Son, Xalqaro hamkorlik markazi direktori Kim Yang Chjin, Korxonalar o‘sishini qo‘llab-quvvatlash, aqlli mahsulotlar va boshqa yo‘nalishlar markazlari direktorlari hamda yetakchi tadqiqotchilari ishtirok etdilar.

Uchrashuv davomida tomonlarga IT Park Uzbekistan faoliyati, uning infratuzilmasi, rezidentlar ekotizimi, startaplarni qo‘llab-quvvatlash dasturlari va xalqaro tashabbuslar haqida umumiy ma’lumot berildi. Janubiy Koreya tomoni viloyat ma’muriyatining xorijiy hamjamiyatlar bo‘limi faoliyat yo‘nalishlarini taqdim etdi va Kyongbuk texnoparki hamda IT Park Uzbekistan markazlari o‘rtasida hamkorlik o‘rnatishga qiziqish bildirdi.

Kyonsanbuk-do mintaqaviy viza dasturining pilot loyihasi

Janubiy Koreya tomoni xorijiy mutaxassislarni jalb qilish va ish bilan ta’minlashga qaratilgan mintaqaviy viza dasturini taqdim etdi. O‘zbekistonlik IT-mutaxassislarning Koreyada yozgi amaliyot va malaka oshirish dasturlarida ishtirok etish imkoniyatlari muhokama qilindi. Shuningdek, tajribali o‘zbekistonlik amaliyotchilarni O‘zbekiston bozorida faoliyat yuritayotgan Janubiy Koreya kompaniyalariga mamlakat/loyiha menejeri lavozimiga ishga joylashtirish uchun tavsiya etish tashabbusi ilgari surildi.

Iqtidorlar mobilligi va L2G (Local to Global) dasturi orqali bozorga kirish

Tomonlar mintaqaviy vizadan O‘zbekiston kompaniyalarining Janubiy Koreya bozoriga kirish vositasi sifatida foydalanish imkoniyatlarini muhokama qildilar. Kutilayotgan natijalar qo‘shma korxonalar tashkil etish va mahalliy IT-kompaniyalar uchun Koreya bozoriga kirishni osonlashtirishni o‘z ichiga oladi.

Qo‘shma tashabbuslar va investitsiyalar
Koreya tomoni O‘zbekiston va Koreya kompaniyalari o‘rtasida qo‘shma korxonalar tashkil etishga ko‘maklashishga, jumladan, ehtimoliy investitsion yordam ko‘rsatishga tayyorligini bildirdi.

Qo‘shma yo‘l xaritasini ishlab chiqish

Tomonlar startaplarni tezlashtirish, kompaniyalarni jalb qilish va qo‘shma korxonalar tashkil etish bo‘yicha yo‘l xaritasini ishlab chiqishga kelishib oldilar. Ushbu chora-tadbirlar transchegaraviy hamkorlikni faollashtirish va ikki mamlakat kompaniyalarining yangi bozorlardagi mavqeini mustahkamlashga qaratilgan.

Uchrashuv O‘zbekiston va Janubiy Koreya o‘rtasidagi mintaqalararo texnologik muloqotni rivojlantirishda muhim qadam bo‘ldi. IT Park Uzbekistan ikki mamlakat startaplari va IT-kompaniyalari uchun yangi imkoniyatlar yaratib, xalqaro hamkorlikni mustahkamlashda davom etadi.