IT Park Uzbekistan kreativ industriyani rivojlantirish bo‘yicha yangi tashabbuslarni e’lon qildi

IV Butunjahon kreativ iqtisodiyot konferensiyasi doirasida IT Park bosh direktori Farhod Ibragimov nutq so‘zladi. U O‘zbekistondan kreativ xizmatlarni eksport qilish imkoniyatlari, IT Park taqdim etayotgan qo‘llab-quvvatlash dasturlari haqida ma’lumot berdi, shuningdek, mamlakatning kreativ sanoatini rivojlantirish va kreativ xizmatlar eksportini ko‘paytirish maqsadida O‘zbekiston Madaniyat va san’atni rivojlantirish jamg‘armasi bilan hamkorlikda amalga oshiriladigan bir qator yangi tashabbuslarni e’lon qildi.

Kelgusi yildan boshlab, O‘zbekiston Madaniyat va san’atni rivojlantirish jamg‘armasi bilan hamkorlikda IT Park ikkita muhim loyihani ishga tushiradi:

1. Kreativ inkubator — bu kreativ sanoat sohasidagi startaplar uchun noyob dastur. Dastur 3 oyga mo‘ljallangan bo‘lib, yiliga 2 marta o‘tkaziladi. Ishtirokchilarni kreativlik, tadbirkorlik va IT sohasidagi yetakchi mutaxassislar qo‘llab-quvvatlaydi, ularga o‘z g‘oyalarini haqiqiy loyihalarga aylantirish va yangi bosqichga olib chiqishda yordam beradi.
2. Raqamli kreativ laboratoriya — an’anaviy san’atni raqamli san’atga integratsiya qilish platformasi. Laboratoriya IT Parkning Toshkent filialida ochiladi. U yerda rassomlar raqamli san’at, grafik dizayn, animatsiya va multimedia sohalarida yangi ko‘nikmalarni egallaydilar, shuningdek, IT Park rezident kompaniyalarida amaliyot o‘tash va ishga joylashish imkoniyatiga ega bo‘ladilar.

Shuningdek, Farhod Ibragimov o‘z nutqida O‘zbekiston so‘nggi yillarda kreativ iqtisodiyotni rivojlantirishda barqaror o‘sishni ko‘rsatayotganini ta’kidladi. Buni IT Park rezidentlari sonining ko‘payishi va kreativ xizmatlar eksportining o‘sishi, shuningdek, mahalliy kompaniyalar uchun yaratilgan ta’lim dasturlari, zamonaviy texnologiyalar va xalqaro bozorlarga chiqish imkoniyatlari tasdiqlaydi.

Ta’kidlash joizki, dunyoda kreativ autsorsing xizmatlarining global bozori 60 milliard dollarga baholanmoqda va 2030-yilgacha 100 milliard dollargacha o‘sishi kutilmoqda. IT Park Uzbekistanning maqsadi — mamlakat iqtisodiyotiga hissa qo‘shish va mahalliy yoshlar uchun ko‘proq yuqori maoshli ish o‘rinlarini yaratish orqali O‘zbekistonning jahon miqyosidagi ishtirokini kengaytirishdir.

Misol uchun, o‘tgan yili ITes eksporti hajmi 344 million dollarni, ITes bozorining umumiy hajmi esa 1 milliard dollarni tashkil etdi. Shundan 21 million dollari kreativ xizmatlarga to‘g‘ri kelib, ularning 94 foizi xorijga sotilgan.

IT Park rezidentlari tomonidan ko‘rsatilgan kreativ xizmatlar eksporti geografiyasi:

• 48% — Yevropa va Buyuk Britaniya
• 28% — Shimoliy Amerika
• 20% — MDH
• 3% — Osiyo-Tinch okeani mintaqasi
• 1% — MENA

Bugungi kunda IT Parkning kreativ sanoat sohasidagi rezidentlari soni 112 tani tashkil etadi, ular orasida “East Games”, “Grace Projects”, “AmayaSoft”, “United Soft”, “Weaya”, “Exodus” va “StoryTech” kabi kompaniyalar bor. Ushbu kompaniyalar GameDev, AR/VR, grafik dizayn, animatsiya sohalarida mahsulot va xizmatlarni taqdim etmoqda.

Kreativ industriya sohasidagi kompaniyalarni qo‘llab-quvvatlash

Joriy yil boshidan boshlab, kreativ sanoat vakillari IT Park rezidenti bo‘lishlari va imtiyozlar hamda qo‘llab-quvvatlash dasturlaridan foydalanishlari mumkin. Veb-dizayn, grafik dizayn, kompyuter o‘yinlari dizayni, 3D grafika, vizuallashtiruvchi dizayn, interfeyslar dizayni, shuningdek, ixtisoslashtirilgan dasturiy ta’minotdan foydalangan holda animatsion mahsulotlarni ishlab chiqish bilan shug‘ullanuvchi kompaniyalar rezidentlik imtiyozlaridan foydalana oladilar.

IT Park Uzbekistan kreativ kompaniyalarni qo‘llab-quvvatlash uchun bir qator xizmatlarni taklif etadi. Masalan, “One Stop Shop” dasturi biznesni boshlash uchun barcha zarur imkoniyatlarni ochib, kompaniyani tez va samarali ro‘yxatdan o‘tkazish imkonini beradi. “Zero Risk” dasturi O‘zbekiston hududlarida o‘z faoliyatini kengaytirmoqchi bo‘lgan kompaniyalar, shuningdek, mamlakatimiz bozoriga kirmoqchi bo‘lgan xorijiy kompaniyalar uchun risk va xarajatlarni minimallashtirgan holda mo‘ljallangan.

Yana bir muhim tashabbus — mahalliy kompaniyalarga xizmatlar va mahsulotlar eksportida ko‘maklashish orqali xalqaro bozorlarga chiqishga yordam beradigan “Local2Global” dasturidir. Ushbu dasturlar tufayli IT Park rezidentlarga barcha zarur resurslar va infratuzilmani taqdim etib, kreativ sohalarni rivojlantirish uchun mukammal sharoit yaratmoqda.

Shuningdek, kreativ texnologik loyihalar asoschilari “President Tech Award”, “MgovAward” kabi startap tanlovlarida ishtirok etishlari mumkin. Joriy yilda IT Park va “Astana Hub” “Central Asian Innovation Hubs” alyansiga asos soldi, bu esa mintaqaviy startaplarga, jumladan, kreativ sanoat sohasida — o‘z loyihalarini xalqaro tadbirlarda namoyish etish va global akseleratorlarda ishtirok etish uchun yanada ko‘proq imkoniyatlar yaratadi.

IT Park rezidenti bo‘lish uchun kompaniya O‘zbekistonda yuridik shaxs sifatida ro‘yxatdan o‘tgan bo‘lishi va biznes-reja taqdim etishi kerak. Bu kompaniyalarga rivojlanish va yangi bozorlarga chiqish imkonini berib, IT Park imkoniyatlari va resurslaridan foydalanish imkonini beradi.

Rezidentlikka ariza topshirish: https://my.it-park.uz