ITPARK - IT Park Uzbekistan Saudiya Arabistoni bilan hamkorlikni mustahkamlamoqda

IT Park Uzbekistan Saudiya Arabistoni bilan hamkorlikni mustahkamlamoqda

Ijrochi direktor Abdulahad Kuchkarov boshchiligidagi IT Park Uzbekistan delegatsiyasi Ar-Riyodda bo‘lib o‘tgan “BIBAN 2024” konferensiyasida ishtirok etdi va O‘zbekistonni global texnologik xab sifatida ilgari surib, qator muhim uchrashuvlar o‘tkazdi. Delegatsiya 13 ta o‘zbekistonlik startaplar hamrohligida potensial investorlar, mahalliy hokimiyat vakillari va texnologik ekotizim yetakchilari bilan muzokaralar olib borib, O‘zbekistonni xorijiy investitsiyalar va texnologik hamkorlik uchun istiqbolli yo‘nalish sifatida ko‘rsatdi.

Rasmiy dastur doirasida “BIBAN 2024” konferensiyasida IT Park Uzbekistan, shuningdek, “Jobster”, “Kitcheff”, “Testbor”, “DataGaza”, “Cradle Vision”, “Sales Doctor”, “Iman Invest”, “FOM Group”, “TIMZ,” “Deepen” va “kpi.com” kabi mahalliy startaplar ishtirok etdi. Ushbu tadbirda qatnashish O‘zbekiston startap ekotizimining rivojlanish dinamikasi va xalqaro investorlar uchun infratuzilmaning mavjudligini ta’kidladi. O‘zbekistonlik startaplar salohiyatli hamkorlar bilan samarali muzokaralar olib borib, ularning ishtirokini kengaytirish va O‘zbekiston texnologik sektorini mustahkamlash maqsadida investitsiya va hamkorlik imkoniyatlarini muhokama qildilar.

Ar-Riyodda o‘tkazilgan “Uzbekistan Tech Conference”

“StrategEast” va “Monsha’at” kompaniyalari bilan hamkorlikda IT Park Uzbekistan Ar-Riyoddagi Kichik va o‘rta biznesni qo‘llab-quvvatlash markazida “Uzbekistan Tech Conference” tadbirini tashkil etdi. Unda 50 dan ortiq davlat organlari, venchur fondlari, biznes farishtalar va soha yetakchilari ishtirok etishdi.

Ochilish narosimi O‘zbekiston IT-sanoati salohiyatiga bag‘ishlangan mazmunli sessiyaga turtki berdi. Taqdimotlarda mamlakatning texnologiyalar sohasidagi yutuqlari, investitsiya imkoniyatlari, yuqori malakali kadrlar salohiyati hamda startap va venchur kapital ekotizimlaridagi so‘nggi yutuqlar yoritib berildi. Mehmonlarga O‘zbekistonning startap va texnologiya ekotizimi taqdim etilib, investitsiyalar uchun istiqbolli yo‘nalishlar taklif qilindi, shuningdek, hamkorlik va kelgusi o‘sish uchun imkoniyatlar namoyish etildi.

Tadbir startaplarning taqdimoti bilan davom etdi, unda O‘zbekistondan to‘qqizta IT-kompaniya — “TIMZ”, “KitCheff”, “TestBor”, “Cradle Vision”, “Sales Doctor”, “Jobster”, “Deepen”, “DataGaze” va “kpi.com” Saudiya Arabistonining venchur fondlari va investorlari oldida o‘zlarining innovatsion yechimlarini taqdim etdilar. Har bir startap turli sohalarda o‘ziga xos g‘oyalarni namoyish etdi, bu esa ishtirokchilarda ulkan qiziqish uyg‘otib, potensial hamkorlik bo‘yicha mazmunli muhokamalar uchun yo‘l ochdi. Startaplar, shuningdek, yangi mijozlar, hamkorlar va investorlarni jalb qilish imkoniyatlari o‘rganildi, bu esa tadbirga jadal va samarali tus berdi.

Tadbir O‘zbekiston va Saudiya Arabistoni o‘rtasidagi texnologik hamkorlikni mustahkamlashda muhim bosqich bo‘lib, ikkala davlatning innovatsiyalarni ilgari surish va global texnologik ekotizimlarni kengaytirishga intilishini tasdiqladi. U investorlar tomonidan faol qiziqish uyg‘otdi va O‘zbekistonning mintaqaviy startap bozoridagi asosiy o‘yinchi sifatidagi mavqeyini mustahkamlab, transchegaraviy hamkorlikni mustahkamlashga xizmat qildi.

Aloqa va axborot texnologiyalari vazirligi

Ijrochi direktor Abdulahad Kuchkarov boshchiligidagi IT Park delegatsiyasi Aloqa va axborot texnologiyalari vazirligi vakillari, jumladan, Raqamli tadbirkorlik markazi bosh direktori Abdulla Alshamrani bilan uchrashuv o‘tkazdi.

Muhokamalar davomida asosiy e’tibor venchur fondini yaratish va IT Park loyihalari ustida birgalikda ishlash imkoniyatlariga qaratildi, bu esa mavjud va kelajakdagi tashabbuslarni qo‘llab-quvvatlash uchun uzoq muddatli hamkorlikni rivojlantirishga zamin yaratdi. Geyming, sport, blokcheyn va raqamli media kabi muhim sohalarda startaplarni rivojlantirishga bo‘lgan ehtiyojning ortib borayotganiga alohida e’tibor qaratilib, ushbu sohalarda innovatsiyalarni ilgari surish uchun birgalikdagi sa’y-harakatlar muhimligi ta’kidlandi.

Muhokama doirasida startaplar, investorlar, universitetlar va venchur fondlari o‘rtasida mustahkam aloqalarni yaratishga qaratilgan “CODE” loyihasi hamda o‘zbek startaplari uchun qo‘shma tadbirlar o‘tkazish taklifi ko‘rib chiqildi. O‘zbekistonning rivojlanayotgan texnologik ekotizimida xususiy sektor ishtirokini kengaytirish maqsadida startaplarga investitsiyalarni jalb qilishning samarali strategiyalari muhokama qilindi. Aloqa va axborot texnologiyalari vazirligi ushbu istiqbolli sohalarda startaplarning o‘sishini qo‘llab-quvvatlash uchun IT Park bilan hamkorlik qilishga tayyorligini bildirdi va xususiy investitsiyalarni rag‘batlantirish usullarini o‘rganishga rozi bo‘ldi. Shuningdek, o‘zbek startaplari uchun “CODE” loyihasi bilan birgalikda qo‘shma tadbir o‘tkazish rejalashtirilgan bo‘lib, bu transchegaraviy hamkorlik va innovatsiyalarni rivojlantirishda muhim qadam bo‘ldi.

Saudiya Arabistoni investitsiyalar vazirligi

Abdulahad Kuchkarov biznesni rivojlantirish bo‘yicha bosh menejer Abdurahmon A. Almutlak va biznesni rivojlantirish bo‘yicha tahlilchi Muhammad Al-Xarbi tomonidan taqdim etilgan Investitsiyalar vazirligi bilan muzokaralar o‘tkazdi. IT Park delegatsiyasi ehtimoliy hamkorlikni, jumladan, venchur fondini yaratish va o‘yin ishlab chiqish, sun’iy intellekt, chuqur texnologiyalar va raqamli media kabi sohalarda startaplarni qo‘llab-quvvatlash masalalarini muhokama qildi.

Tomonlar, shuningdek, o‘zbekistonlik startaplarni Saudiya Arabistoni bozoriga olib chiqish imkoniyatlarini o‘rganib, ularning kirishini osonlashtiradigan va mahalliy bozor ehtiyojlarini qondiradigan qo‘llab-quvvatlash dasturlarini ko‘rib chiqdilar. O‘zbekiston Raqamli texnologiyalar vazirining ikki mamlakat vazirliklari o‘rtasidagi hamkorlikni mustahkamlash va qo‘shma tashabbuslarni yo‘lga qo‘yishga qaratilgan rasmiy tashrifiga tayyorgarlik asosiy mavzulardan biri bo‘ldi. Investitsiyalar vazirligi IT Park’ni ro‘yxatdan o‘tkazish jarayoniga ko‘maklashish va o‘zbekistonlik startaplarning Saudiya Arabistoni bozoriga chiqishini qo‘llab-quvvatlashga tayyorligini bildirdi.

O‘zbekiston Raqamli texnologiyalar vazirining ikki mamlakat vazirliklari o‘rtasidagi aloqalarni mustahkamlash va qo‘shma loyihalarni amalga oshirishni boshlashga qaratilgan rasmiy tashrifi muhokamalarning asosiy mavzusiga aylandi.

The Garage — Ar-Riyodning yetakchi inkubatsiya markazi

Delegatsiya “The Garage” kompaniyasiga tashrif buyurib, unda mamlakatlar o‘rtasida startap almashish dasturini ishga tushirish imkoniyatlari muhokama qildi. Uchrashuv chog‘ida, shuningdek, o‘zbek startaplarini qo‘llab-quvvatlash chora-tadbirlari va O‘zbekiston startap ekotizimini rivojlantirish va hamkorlikning yangi yo‘nalishlarini aniqlashga qaratilgan qo‘shma tashabbuslarni boshlash masalalari ko‘rib chiqildi.

“The Garage” inkubatorlar orasida maydoni bo‘yicha “Station F”dan keyin dunyodagi ikkinchi eng yirik inkubatsiya markazi sifatida e’tirof etiladi. Ushbu tashabbus har ikki mamlakat startaplarini qo‘llab-quvvatlashning barqaror mexanizmlarini yaratishga qaratilgan bo‘lib, ularning rivojlanishiga hissa qo‘shadi va innovatsiyalarni rag‘batlantiradi.

“The Garage” rivojlanishning dastlabki bosqichlarida kompaniyalarga zarur resurslar va qo‘llab-quvvatlashni taqdim etuvchi yetakchi startap inkubatoridir.

“Vision Invest” va “DataVolt” kompaniyalariga tashrif

IT Park ijrochi direktori Abdulahad Kuchkarov boshchiligidagi delegatsiya “Data Volt Holding” tarkibiga kiruvchi “Vision Invest” kompaniyasining asosiy vakillari, jumladan, strategik hamkorlik bo‘yicha katta menejer Yazid Altnean va xususiylashtirish sektori vitse-prezidenti Yusuf Alzuhair bilan uchrashdi. Uchrashuvda “DataVolt” kompaniyasi bosh menejeri Yahyo Aldahiri ham ishtirok etdi.

Muhokama davomida Saudiya Arabistoni bozorida samarali venchur loyihalarini yaratish imkoniyatlariga e’tibor qaratgan holda o‘zbek startaplarini qo‘llab-quvvatlash uchun potensial hamkorlik masalalari muhokama qilindi. Saudiya Arabistoni bozorining o‘zbek startaplari uchun jozibadorligi va iqtisodiy salohiyati ko‘rib chiqildi, “Vision Invest” kompaniyasi esa qulay shartlar asosida o‘zbek startaplari uchun mintaqaviy vakolatxona tashkil etishda ko‘maklashishga tayyorligini bildirdi.

Tomonlar Saudiya Arabistoni bozorida o‘zbek startaplarini ilgari surishga kelishib oldilar va venchur kapitalini jalb qilish strategiyalarini muhokama qildilar. Saudiya Arabistoni vakillari IT Park’ning Saudiya Arabistonidagi barqaror ishtirokini yaratish bo‘yicha maqsadlarini qo‘llab-quvvatlashga intilishlarini bildirib, IT Park’ning Qirollikda doimiy vakolatxonasini ochishda yordam berishga vada berdilar.

“Vision Invest” — loyihalarni boshqarish va strategik sherikchilikni yo‘lga qo‘yish hamda turli sohalarda o‘sishni rag‘batlantirishga ixtisoslashgan investitsiya kompaniyasi. Iqtisodiy rivojlanishga yo‘naltirilgan kompaniya innovatsion investitsiya strategiyalari va mustahkam hamkorlik aloqalari orqali qiymat yaratishga intiladi. “Vision Invest” O‘zbekistonda faoliyat yuritib, mintaqaviy o‘sish va iqtisodiyotni diversifikatsiya qilishda muhim rol o‘ynamoqda.

“Data Volt” — ma’lumotlarga asoslangan strategiyalar orqali biznesni qo‘llab-quvvatlash, shuningdek, infratuzilmani rivojlantirishga qaratilgan ma’lumotlarni boshqarish va texnologiyalar sohasidagi yechimlarning yetakchi provayderi.

“Nawah AI” bilan anglashuv memorandumi

IT Park Uzbekistan “Nawah AI” kompaniyasi bosh direktori Muhammad Xatata bilan o‘zbek startaplarining Saudiya Arabistoni bozoriga chiqish strategiyalarini muhokama qilish uchun uchrashuvlar o‘tkazdi va buning natijasida o‘zaro anglashuv memorandumini imzolandi. Ijrochi direktor Abdulahad Kuchkarov va bosh ijrochi direktor Muhammad Hatata tomonidan rasmiylashtirilgan ushbu hamkorlik birgalikdagi sa’y-harakatlar uchun zamin yaratadi.

Unga ko‘ra, “Nawah AI” Saudiya Arabistoni bozoriga chiqishda o‘zbekistonlik startaplarni har tomonlama qo‘llab-quvvatlaydi. Bitim B2B-savdolarida ko‘maklashish va mahalliy investorlardan sarmoya jalb qilishni ko‘zda tutadi, bu esa o‘zbek texnologik kompaniyalarining o‘sishi va strategik rivojlanishiga yordam beradi. O‘zaro anglashuv memorandumining keng ko‘lamli xarakteri kelgusi hamkorlik va birgalikdagi o‘sish imkoniyatlari uchun imkoniyatlar eshigini ochadi.

“Nawah AI” — xalqaro bozorlarni birlashtirish va strategik hamkorlik orqali texnologik o‘sishni rag‘batlantirishda asosiy rol o‘ynaydigan sun’iy intellekt va texnologiyalar yechimlariga ixtisoslashgan kompaniya.

Bundan tashqari, “Monsha’at”, “SDAIA”, Raqamli hamkorlik tashkiloti (DCO) va “Transcend Consulting” kabi qator tashkilotlar bilan uchrashuvlar o‘tkazildi.

Monsha’at

Ijrochi direktor Abdulahad Kuchkarov O‘zbekiston startap ekotizimini rivojlantirish va uning Saudiya Arabistoni bozoridagi ishtirokini kengaytirishga qaratilgan potensial qo‘shma dasturlarni muhokama qilish maqsadida Hoshim Almarzuk bilan uchrashdi. Saudiya Arabistonining Kichik va o‘rta korxonalar bosh boshqarmasi “Monsha’at” bilan hamkorlik o‘zbekistonlik startaplar uchun Saudiya Arabistoni bozorida o‘z mavqeyini mustahkamlash uchun katta imkoniyatlar ochadi. “Monsha’at” mintaqaviy o‘sishga intilayotgan startaplar uchun muhim manba hisoblangan akseleratsiya dasturlari orqali qo‘llab-quvvatlashni taklif qiladi. IT Park Uzbekistan ushbu imkoniyatlardan foydalanib, o‘zbekistonlik startaplarni Saudiya Arabistoni akseleratorlari bilan bog‘lash va bozorga muvaffaqiyatli chiqishlari uchun ularga zarur yordam ko‘rsatishni maqsad qilgan.

Bundan tashqari, hamkorlik qo‘shma akseleratsiya va inkubatsiya markazlarini, shuningdek, sun’iy intellekt va fintech kabi istiqbolli sohalarda ta’lim va murabbiylik dasturlarini yaratishni o‘z ichiga olishi mumkin. Ushbu tashabbuslar startap ekotizimini rivojlantirish uchun yanada dinamik va qo‘llab-quvvatlovchi muhitni yaratish orqali har ikki mamlakatda innovatsiyalar va o‘sishga hissa qo‘shishi mumkin.

“Monsha’at” — Saudiya Arabistonining biznesni rivojlantirish, moliyaviy qo‘llab-quvvatlash va xalqaro aloqalarni mustahkamlashga qaratilgan kichik va o‘rta korxonalar bosh boshqarmasi. Monsha’at startaplarning xalqaro bozorlarga chiqishiga yordam beradigan turli dasturlarni amalga oshiradi.

SDAIA

Bundan tashqari, IT Park jamoasi “SDAIA” vakillari, xususan, mahalliy va xalqaro hamkorlik bo‘yicha direktor Turki Alramah bilan uchrashuv o‘tkazdi. Muhokamalar sun’iy intellekt sohasidagi loyihalarni amalga oshirish, raqamli transformatsiya yo‘lida startaplarni qo‘llab-quvvatlash va O‘zbekiston tomonidan sun’iy intellekt va IT-xizmatlarini taqdim etishga qaratildi. Suhbat davomida startaplarga sarmoya kiritish imkoniyatlari va tajriba almashish tashabbuslari haqida ham so‘z yuritildi.

“SDAIA” (Saudi Data and Artificial Intelligence Authority) — Saudiya Arabistonidagi sun’iy intellekt va ma’lumotlar sohasidagi tashabbuslarni rivojlantirish bilan shug‘ullanuvchi tashkilot. Uchrashuv davomida sun’iy intellekt sohasidagi loyihalarni amalga oshirish, raqamli transformatsiya jarayonida startaplarni qo‘llab-quvvatlash va o‘zbekistonlik startaplarga sun’iy intellekt va katta ma’lumotlar kabi sohalarda o‘sish uchun resurslardan foydalanish imkoniyatlarini taqdim etish imkoniyatlari muhokama qilindi.

Digital Cooperation Organization

IT Park, shuningdek, hamkorlikni kengaytirish va o‘zbek startaplarining xalqaro bozorlarga chiqishini qo‘llab-quvvatlash maqsadida “Digital Cooperation Organization” vakillari bilan uchrashuv o‘tkazdi. Muzokaralar chog‘ida tomonlar O‘zbekiston va tashkilotga a’zo davlatlar o‘rtasidagi texnologik sheriklikni mustahkamlashga qaratilgan o‘zaro qo‘llab-quvvatlash yondashuvlarini kelishib oldilar. Tashkilot startaplarni rivojlantirish va transchegaraviy hamkorlikni rag‘batlantirish uchun barcha a’zo mamlakatlarda hamkorlikni yo‘lga qo‘yishga yordam berishni taklif qildi.

“Digital Cooperation Organization” — iqtisodiy o‘sish va raqamli inklyuzivlikni rag‘batlantirish maqsadida raqamli transformatsiyani jadallashtirish va a’zo mamlakatlar o‘rtasidagi hamkorlikni mustahkamlashga qaratilgan xalqaro tashkilot.

Transcend Consulting

Yakuniy uchrashuvda “Transcend Consulting” kompaniyasi vakillari Saudiya Arabistonida IT Park’ni tashkil etish uchun huquqiy va operatsion yordam ko‘rsatishni taklif qilishdi. Kompaniya Saudiya Arabistoni bozorida IT Park faoliyatini muvaffaqiyatli boshlashni ta’minlaydigan me’yoriy talablarga muvofiqlik va zarur hujjatlarni tayyorlashga ko‘maklashadi.

“Transcend Consulting” — xalqaro biznes kengayishlari uchun tartibga solish va operatsion yordam ko‘rsatishga ixtisoslashgan yuridik va konsalting kompaniyasi.

IT Park delegatsiyasi, shuningdek, “1K Leaders”, “Flat6Labs”, “Raed”, “Maak Solution” va “Arab Consult House” kabi tashkilotlar vakillari bilan muzokaralar o‘tkazdi. Uchrashuvlar doirasida O‘zbekistonda startaplar va venchur kapital ekotizimini rivojlantirish uchun yaratilayotgan sharoitlar, jumladan, kadrlar salohiyati va IT Park tomonidan taklif etilayotgan imtiyozlar muhokama qilindi. Mamlakatning iqtisodiy o‘sishi va so‘nggi ijobiy siyosiy o‘zgarishlarga bag‘ishlangan taqdimotlar o‘tkazildi. Kompaniyalar vakillari O‘zbekistonning startap salohiyati va venchur imkoniyatlarini o‘rganishga qiziqish bildirdilar va so‘nggi yillarda mamlakatning hayratlanarli rivojlanish sur’atlarini qayd etdilar.

Mazkur uchrashuvlar O‘zbekiston va Saudiya Arabistoni o‘rtasidagi hamkorlikni kengaytirish, xorijiy investitsiyalarni jalb qilish hamda o‘zbek startaplari va texnologik kompaniyalarining global ishtirokini mustahkamlash yo‘lida muhim qadam bo‘ldi. Bunday hamkorlik O‘zbekistonga kapitalni oshirish, yangi bozorlar va texnologik tajribalardan foydalanish imkonini beradi, shu bilan birga, an’anaviy tarmoqlardan tashqariga chiqib, iqtisodiy taraqqiyot, ish o‘rinlari yaratish va iqtisodiyotni diversifikatsiya qilishga xizmat qiladi.

2024-11-08