IT Park Uzbekistan Xanti-Mansi avtonom okrugi delegatsiyasi bilan uchrashuv o‘tkazdi

IT Park Uzbekiston bosh qarorgohida biznesni rivojlantirish bo‘yicha direktor Jahongir Rajabov Xanti-Mansiysk avtonom okrugi — Yugra (Rossiya Federatsiyasi) delegatsiyasi bilan uchrashuv o‘tkazdi. Tomonlar raqamli rivojlanish va IT-biznesni qo‘llab-quvvatlash sohasidagi tajribalarini o‘zaro almashdilar.

Delegatsiya tarkibiga quyidagilar kirdi: Pavel Tsiporin — gubernator o‘rinbosari, Axborot texnologiyalari va raqamli rivojlanish departamenti direktori; Galina Mixaylova — Departament direktori o‘rinbosari, Axborot jamiyatini rivojlantirish boshqarmasi boshlig‘i; Larisa Tsulaya — Ta’lim va fan departamenti ma’muriy boshqarmasi boshlig‘i; Mariya Fedotova — Yoshlar siyosati departamentining Rossiya mintaqalari va MDH mamlakatlari bilan hamkorlik bo‘limi boshlig‘i; Andrey Melnikov — Xanti-Mansi avtonom okrugi avtonom muassasasi direktori; Igor Anfalov — “Raqamli poligon” NNT ijrochi direktori.

Tashrif doirasida IT Park Uzbekiston vakillari texnopark infratuzilmasi, rezidentlar ekotizimi, IT-kompaniyalarni davlat tomonidan qo‘llab-quvvatlash choralari, IT-ta’limni rivojlantirish, shuningdek, startaplarni rivojlantirish va raqamli xizmatlar eksportini oshirishga qaratilgan dasturlar haqida ma’lumot berishdi.

Muhokamalar davomida IT-biznesni qo‘llab-quvvatlash va yo‘naltirish, raqamlashtirish sohasida tajriba almashish, IT-eksportni rag‘batlantirish, shuningdek, O‘zbekiston va Xanti-Mansi avtonom okrugi rivojlanish institutlari o‘rtasida barqaror hamkorlikni yo‘lga qo‘yish istiqbollariga alohida e’tibor qaratildi.

Xanti-Mansi delegatsiyasi tomonidan tajriba almashish uchun IT Park rezidentlarining tashrifini tashkil etish taklif etildi.

Har ikki tomon raqamli yechimlar, kadrlar tayyorlash va ikki mintaqaning texnologik ekotizimlari o‘rtasidagi transchegaraviy hamkorlik sohasida muloqotni davom ettirish va qo‘shma loyihalarni amalga oshirishdan manfaatdor ekanliklarini bildirdilar.