IT Park xodimasi “ITWomen.Uz” doirasida oʻtkazilgan marafon gʻolibiga aylandi!

2021-yil 25-iyun kuni Z.M. Bobur nomidagi markaziy ekologik parkda “ITWomen.Uz - 2021” kurslarini muvaffaqiyatli tugatgan ayol va qizlarga sertifikatlarni topshirish marosimi boʻlib oʻtdi, unda 1000 metrlik marafon ham oʻtkazildi.

Tadbir Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, IT Park va Oʻzbekiston Respublikasi Mahalla va oilani qoʻllab-quvvatlash vazirligi tomonidan tashkil etildi.

Tadbirda “ITWomen.Uz - 2021” kurslarini muvaffaqiyatli tamomlagan ayol va qizlar, Oʻzbekiston Respublikasi Axborot texnologiyalari va kommunikatsiyalarini rivojlantirish vazirining oʻrinbosari Jamshid Egamberdiev, Axborot texnologiyalari va kommunikatsiyalarini rivojlantirish vazirligi Markaziy apparati xodimlari, vazirlikka boʻysunuvchi korxonalar, tashkilotlar va ommaviy axborot vositalari vakillari qatnashdilar.

Tadbirning ikkinchi qismida boʻlib oʻtgan 1000 metrlik marafonda IT park xodimi Elvira Salavatova 21 yoshdan 25 yoshgacha boʻlgan yosh toifasida gʻoliblikni qoʻlga kiritdi. Tanlov gʻoliblariga sovgʻalar va sertifikat topshirildi.

Tadbir yakunida barcha ishtirokchilarni maxsus taklif etilgan rassomlar va bufet stoli kutib turdi.