Jizzaxda IT Park yangi filiali ochildi!

2020-yilning 11-noyabr sanasida Jizzax shahrida IT Park filiali ochilish marosimi boʻlib oʻtdi.

Marosimda Jizzax viloyati hokimi Ergash Soliyev, Axborot va kommunikatsiyalarni rivojlantirish vaziri oʻrinbosari Bahromjon Olmatov, Hindistonning Oʻzbekistondagi favqulodda va muxtor elchisi Manish Prabxat hamda IT Parkʼning xalqaro faoliyat boʻyicha direktor oʻrinbosari Boxodir Ayyupov, shuningdek IT Park Maslahatchisi Jayram Partasartilar ishtirok etishdi.


 

IT Park filiali Sharof Rashidov koʻchasi, 64-uy manzilidagi Jizzax viloyati hokimiyati binosida joylashgan.

IT Park filiali loyihasiga hind konsultanti, IT Park Maslahatchisi Jayram Partasarti boshchilik qildi. Loyihaning umumiy summasi – 5,5 mlrd soʻm.

Jizzaxda IT Parkʼning ochilishi – bu katta va zalvarli ish, – dedi Jizzax viloyati hokimi Ergash Alibekovich Soliyev. Endi bizda, Jizzax yerlarida ham axborot texnologiyalaridek muhim sohada iqtidorlarni yuksaltirish imkonini beruvchi joy bor. IT Park Jizzax binolarida qulay va samarali ishlash uchun barcha sharoitlar yaratilgan: tezkor internet, konditsionerlashtirish, 46 kishilik konferens zal, kutubxona, kovorking markazi, startap xonalar, robototexnika laborotoriyasi, mediamarkaz, kibersport va innovatsiya sinflari, – qoʻshimcha qildi hokim.

Aytish joizki, IT Park 27/7 rejimda ishlaydi, shu bilan birga unda xalqaro hamkorlar va turli kompaniyalar bilan mustahkam aloqalar oʻrnatish uchun kerakli barcha shart-sharoitlar yaratilgan. Shuningdek, Jizzaxdagi IT Park uzilishlarsiz elektr quvvati, yuqori tezlikdagi internet, konditsionerlashtirish, 24/7 qoʻriqlash tizimi va qulay ishlash uchun kerakli boshqa muhim narsalar bilan taʼminlangan.

 

Qolaversa, IT Parkʼning Jizzax filialida IT Markaz ham ochildi, bu esa oʻz navbatida mahalliy aholining va yoshlarning kompyuter savodxonligini oshirish, aktual IT yoʻnalishlarni, shu jumladan dasturlash, veb dizayn, grafik dizayn, mobil robototexnika, kibersport, IT-English va boshqa koʻplab narsalarni oʻrganish imkoniyatini beradi.

IT Parkʼning Jizzax filiali oʻquv sinflari va kiberzallarga oʻquv auditoriyalari va kabinetlar uchun 43 dona kompyuter toʻplami bilan taʼminlangan, 43 oʻquvchilik 3 ta zamonaviy sinflar yaratilgan. Bu yerda 500 dan ziyod inson taʼlim olishi mumkin.

Bundan tashqari, Hindistonning Oʻzbekistondagi favqulodda va muxtor elchisi Manish Prabxat IT Parkʼning xalqaro faoliyat boʻyicha direktor oʻrinbosari Boxodir Ayyupov hamda IT Park Maslahatchisi Jayram Partasartilar bilan birgalikda Jizzax shahridagi “My happy home” bolalar uyiga tashrif buyurib, yoshlar bilan suhbatlashdilar, ularning qiziqishlari bilan tanishdilar, shuningdek esdalik sovgʻalari ulashdilar.



 

Maʼlumot uchun:

Jizzaxdagi IT Park filiali – hisob boʻyicha 4-filial. Bunga qadar IT Park filiallari Guliston, Margʻilon va Andijonda ochilgan edi.