Kelajak uchun raqamli ko‘nikmalar: KOICA IT Park xodimlari uchun yopiq o‘quv kursini o‘tkazdi

Toshkentdagi IT Park filialida “KOICA” ko‘magida “Dain Leaders” bilan hamkorlikda tashkil etilgan uchinchi bepul texnik ta’limning tantanali yakunlanish marosimi bo‘lib o‘tdi. Dastur ikki hafta davom etib, axborot texnologiyalarining asosiy yo‘nalishlari bo‘yicha sakkizta kursni qamrab oldi.

O‘quv kursining birinchi yarmida ishtirokchilar tarmoq asoslari, ma’lumotlarni tahlil qilish, mashinali o‘rganish va Python dasturlashni o‘rganishdi. Ikkinchi yarmida esa ma’lumotlar bazalari bilan ishlash, trafik tahlili va IT-murabbiy vazifasiga tayyorgarlik ko‘rishga chuqurroq kirishdilar. Barcha kurslar IT Park rezidentlari, oliy o‘quv yurtlari talabalari va texnologiya sohasida rivojlanishni istagan ish izlovchilar uchun bepul taqdim etildi.

Asosiy ta’lim yo‘nalishlari:

• Tarmoq asoslari (Cisco Packet Tracer, WireShark);
• Data Science va mashinali o‘rganish;
• Sun’iy intellekt uchun Python dasturlash;
• Ma’lumotlar bazasi bilan ishlash (PostgreSQL, MySQL);
• IT-murabbiylarni tayyorlash (ToT).

Ishtirokchilar nafaqat nazariy bilimlarni o‘zlashtirishdi, balki ularni amaliyotda ham qo‘llashdi: loyihalar ishlab chiqishdi, keyslarni yechishdi va jamoalarda ishlashdi.

Ro‘yxatdan o‘tgan 120 nafar tinglovchidan 75 nafardan ortig‘i o‘qishni muvaffaqiyatli yakunladi. Ularga “KOICA Uzbekistan” direktor o‘rinbosari Pak Sol Ri va IT Park xizmatlar eksportini rivojlantirish bo‘yicha direktori Mahliyo Muksinova sertifikatlar topshirdi.

Uchinchi bepul texnik ta’limning yakunlanishi O‘zbekiston IT-ta’limini rivojlantirishda muhim qadam bo‘ldi. “KOICA” va “Dain Leaders” bilan hamkorlik tufayli ishtirokchilar texnologiya sohasida karyera qurish yoki startaplarni rivojlantirishga yordam beradigan dolzarb bilimlarga ega bo‘ldilar. IT Park Uzbekistan raqamlashtirish davrida mutaxassislarni muvaffaqiyatga erishish vositalari bilan ta’minlab, mamlakatning raqamli innovatsiyalar markazi sifatidagi mavqeini mustahkamlashda davom etmoqda.