Namangan viloyatida «Ideaton» tanlovi bo‘lib o‘tdi

Joriy yilning 23-fevral kuni IT Park Namangan filialida IT Park tomonidan Namangan viloyati hokimligi hamda Axborot texnologiyalari va kommunikatsiyalarini rivojlantirish vazirligining viloyat hududiy boshqarmasi hamdayoshlar ishlari Agentligi viloyat boshqarmasi hamkorligida tashkil etilgan «Ideaton» tadbiri bo‘lib o‘tdi.

Tadbirning ochilishida IT Park Namangan filiali rahbari Muhammadali Ubaydullayev va Namangan viloyati Elektron hukumat tizimini rivojlantirish markazi rahbari Baxtiyor Axunbabayevlar ishtirok etib, kirish so‘zi bilan qatnashib, tanlov ishtirokchilariga maslahatlar berdilar.

 Eslatib oʻtamiz, «Ideaton» – bu kelajakda oʻz texnologik biznesingizni yaratish uchun bir kun ichida gʻoyani oʻylab topish va uni minimal hayotiy mahsulotgacha ishlab chiqish imkonini beruvchi tanlov.

Tanlovda 70 dan ortiq ishtirokchi ro‘yxatdan o‘tgan bo‘lib, ular 3 ta yo‘nalish: sog‘liqni saqlash, moliya va qishloq xo‘jaligi yo‘nalishlari bo‘yicha o‘z loyihalari bilan 40 dan ortiq jamoani tashkil etdi.

“Ishtirok etish davomida tomonlar nafaqat o‘z g‘oyalarini taqdim etish, balki yanada maqbul yechimlarni topish uchun muhokama va bahslarda qatnashish imkoniga ega bo‘ldi.  Bu bizga eng yaxshi IT-g‘oyalarni tanlash imkonini berdi va kelgusida mazkur loyihalar bo‘yicha tizimli ishlar yo‘lga qo‘yiladi”, – deydi Namangan viloyati elektron hukumat tizimini rivojlantirish markazi rahbari Baxtiyor Axunbabayev.



«Ideaton» gʻoliblari quyidagilar boʻldilar:

 Qishloq xoʻjaligi

 1-o‘rin: Agronom ilovasi bilan Community jamoasi;

 2-o‘rin: Suv hodisalarining oldini olish tizimi g‘oyasiga ega Autonomous jamoa;

 3-o‘rin: Avtomatika jamoasi yer osti suvlarini boshqarish tizimi g‘oyasi bilan.

 Moliya

 1-o‘rin: Biznes hisob-kitoblari va buxgalteriya hisobini avtomatlashtirish onlayn xizmatiga ega Oneclick jamoasi;

 2-oʻrin: Bolalar bogʻchalari uchun toʻlovlarni qabul qilishni avtomatlashtirish gʻoyasiga ega The first jamoa;

 3-o‘rin: Internet-do‘konlar uchun to‘lov tizimiga ega Chortoq Designer Group jamoasi.

  Sogʻliqni saqlash

 1-oʻrin: birinchi yordamni oʻrgatish tizimi gʻoyasi bilan Betta group jamoasi;

 2-o‘rin: Touch ID yordamida barcha shakl va kartalarni raqamlashtirish g‘oyasi bilan Grade-up Tech jamoasi;

 3-oʻrin: bemorlarni intellektual parvarish qilish gʻoyasi bilan Frank jamoasi.

Tanlov g‘oliblariga televizor, changyutgich, sharbat chiqargich kabi qimmatbaho sovg‘alar topshirildi.

Ta’kidlash joizki, bunday tadbirlar IT sohasiga qiziquvchi yoshlar safini ko‘paytirib, Namanganda mazkur yo‘nalish rivojiga ijobiy ta’sir ko‘rsatadi.