O‘zbekiston terma jamoasi robototexnika bo‘yicha WorldSkills Internationalʼda ilk bor ishtirok etadi

29–30-mart kunlari Toshkent shahridagi “Ishga marhamat” Monomarkazida “Mobil robototexnika” yo‘nalishi bo‘yicha WorldSkills Uzbekistan – 2022 chempionatining mamlakat bosqichi bo‘lib o‘tdi.

IT Park jamoasi ushbu chempionatda 1-o‘rinni egallab, 2022-yilning 12–17-oktabr kunlari Shanxayda boʻlib oʻtadigan “WorldSkills International” mobil robototexnika boʻyicha 46-Xalqaro jahon chempionatiga yo‘llanma oldi.

Taʼkidlash joizki, IT Park “WorldSkills Uzbekistan” ishchi kasblarini rivojlantirish va ommalashtirish Assotsiatsiyasining asosiy hamkorlaridan biri hisoblanadi.

Eslatib oʻtamiz, “Worldskills International” Assotsiatsiyasi 1946-yilda tashkil etilgan.  Bu dunyodagi eng yirik musobaqa: musobaqa 85 ta mamlakatda oʻtkaziladi.  O‘zbekiston Respublikasi “WorldSkills International” xalqaro assotsiatsiyasiga 2020-yil 17-yanvar kuni a’zo bo‘lib, uning 83-a’zosiga aylandi.

Qayd etish joizki, bu O‘zbekiston terma jamoasining bunday xalqaro musobaqadagi ilk bor ishtirok etishi bo‘ladi.

 IT Park jamoasiga ushbu chempionatda omad tilaymiz!