O‘zbekiston xalqaro IT biznesning yangi markazi sifatidа

2024-yil 23-oktyabr kuni Toshkent shahridagi "Renessans Xoll" majmuasida Xalqaro hamkorlik tashabbuslari haftaligi doirasida "O‘zbekiston xalqaro biznesning yangi markazi sifatida: xorijiy kompaniyalar uchun imkoniyatlar" mavzusidagi panel sessiyasi o‘tkazildi. Ushbu tadbir IT sohasining jadal o‘sishi va hukumat tomonidan amalga oshirilayotgan islohotlarni hisobga olgan holda IT sanoatini rivojlantirish va O‘zbekistonga xorijiy investitsiyalarni jalb qilish istiqbollarini muhokama qilish uchun muhim platforma bo‘ldi.

Panel sessiyasida O‘zbekiston Raqamli texnologiyalar vaziri Sherzod Shermatov, Latviya Respublikasining sobiq prezidenti Raymonds Veyonis, Serbiya Respublikasining sobiq prezidenti Boris Tadich, "IDA Ireland" kompaniyasining Yaqin Sharq bo‘yicha mintaqaviy direktori Shon MakEllin, Xalqaro elektr aloqa ittifoqining sobiq bosh kotibi Hamidun Tyure va "NEC" korporatsiyasining sobiq vitse-prezidenti Akixiro Sakurai ishtirok etdilar.

Sherzod Shermatov 2017-yildan 2023-yilgacha bo‘lgan davrda O‘zbekistonda axborot texnologiyalari sohasi sezilarli o‘sishni ko‘rsatganini ta’kidladi. Uning aytishicha, IT Park rezidentlarining eksport hajmi 573 barobarga oshib, 2023-yil oxiriga kelib 344 million dollarga yetgan. Bu jarayonda mamlakatning texnologik sanoatini rivojlantirish uchun dinamik IT-habga aylangan IT Park Uzbekistan muhim rol o‘ynamoqda.

Raymonds Veyonis o‘z nutqida O‘zbekistonda investitsiya muhitini yaxshilashga qaratilgan islohotlar Yevropa kompaniyalarini jalb qilishda hal qiluvchi ahamiyatga ega ekanligini ta’kidladi. Uning so‘zlariga ko‘ra, IT Park rezidentlari uchun imtiyozlarning 2040-yilgacha uzaytirilishi xorijiy investorlar uchun jozibador sharoitlar yaratmoqda. Bu mamlakatning ulkan rejalarini, jumladan, 2030-yilga borib IT-xizmatlar eksportini 5 milliard dollarga yetkazishni qo‘llab-quvvatlaydi, shuningdek, mamlakatning xalqaro maydondagi investitsion jozibadorligini oshiradi.

Boris Tadich ta’kidlashicha, hukumatning raqamli sohaga e’tibori tufayli O‘zbekiston tez sur’atlar bilan mintaqaviy IT-habga aylanmoqda, bu esa uni xalqaro kompaniyalar uchun eng jozibador bozorlardan biriga aylantirmoqda. O‘zbekistonning global IT-bozordagi asosiy afzalliklari qatorida hukumatning IT-sanoatni faol rivojlantirish va qulay biznes muhitini yaratishga sodiqligi, shuningdek, mamlakatning iqtisodiy va siyosiy barqarorligi ham bor. "O‘zbekistonga sarmoya kiritgan kishi tinchlik va farovonlikka sarmoya kiritadi," dedi janob Tadich.

Shon MakEllinning ta’kidlashicha, mamlakatning eksport salohiyatini rag‘batlantirishga qaratilgan qonun hujjatlariga kiritilgan so‘nggi qo‘shimchalar xalqaro va mahalliy kompaniyalar uchun imkoniyatlarni yanada kengaytirmoqda, eksportchilarga yordam bermoqda va O‘zbekistonni yangi bozorlarga chiqishga intilayotgan IT-biznes uchun jozibador joyga aylantirmoqda. Ushbu omillarning uyg‘unligi xalqaro investorlar uchun qulay muhit yaratib, mamlakatning innovatsion markaz sifatidagi mavqeyini mustahkamlamoqda.

Hamidun Tyure O‘zbekiston BMTning elektron hukumat reytingida 24 pog‘onaga ko‘tarilib, eng ilg‘or rivojlanayotgan davlatlardan biriga aylanganini ta’kidladi. Mamlakat internet xizmatlarining mavjudligi bo‘yicha 22-o‘rinni egalladi. So‘nggi to‘rt yil ichida telekommunikatsiya sohasida amalga oshirilgan ishlar 2020-yilgacha bo‘lgan yutuqlardan sezilarli darajada oshib ketdi va 5G texnologiyasining joriy etilishi hamda yuqori tezlikdagi internetning kengayishi O‘zbekistonning raqamli rivojlanishdagi mavqeyini mustahkamlamoqda.

Akixiro Sakurai o‘z nutqida O‘zbekiston xalqaro IT-bozorga chiqish uchun katta resurslarga, shu jumladan 300 ming nafar malakali yosh mutaxassislarga ega ekanligiga alohida urg‘u berdi. IT-sohaning rivojlanishi, ayniqsa, mehnat resurslari qisqarib borayotgan mamlakatlarga xizmatlar eksportini oshirish uchun imkoniyatlar ochmoqda.

IT-sanoatni yanada rivojlantirish va xorijiy investitsiyalarni jalb qilish O‘zbekiston iqtisodiyotiga sezilarli ta’sir ko‘rsatadi. Sohaning jadal rivojlanishi mamlakatning global IT-hab sifatidagi mavqeyini mustahkamlaydi, minglab yangi ish o‘rinlarini yaratadi, eksport salohiyatini oshiradi va infratuzilmani zamonaviylashtiradi. Ushbu chora-tadbirlar tufayli iqtisodiyotning raqamli sektorining o‘sishi aholi turmush darajasining yaxshilanishiga va O‘zbekistonning jahon iqtisodiyotiga integratsiyalashuvining kuchayishiga olib keladi, uni global biznes va innovatsiyalar uchun jozibador markazga aylantiradi.