O‘zbekistonda Creative Incubator ochildi: kreativ startaplarni rivojlantirishda yangi bosqich

Toshkentdagi Vestminster xalqaro universitetida (WIUT) yosh iste’dodlarni qo‘llab-quvvatlash va kreativ iqtisodiyot sohasida startaplarni rivojlantirishga qaratilgan noyob loyiha — “Creative Incubator”ning tantanali ochilish marosimi bo‘lib o‘tdi.

Kreativ sanoatni rivojlantirishning yangi bosqichi

Ochilish marosimida IT Park Uzbekistan, O‘zbekiston Madaniyat va san’atni rivojlantirish jamg‘armasi hamda “WIUT” vakillari tashabbusning mamlakatda kreativ sanoat ekotizimini shakllantirishdagi ahamiyatini ta’kidladilar. Ular o‘z nutqlarida “Creative Incubator” iqtidorli dizaynerlar, dasturchilar, animatorlar, tadbirkorlar va boshqa kreativ kasb vakillarini o‘ziga jalb qiluvchi markazga aylanishini qayd etdilar.

Loyiha 2024-yil 3-oktyabrda qabul qilingan “Kreativ iqtisodiyot to‘g‘risida”gi qonunni amalga oshirishda muhim rol o‘ynaydi. Ushbu qonun kreativ sanoat tarmoqlarini qo‘llab-quvvatlashning huquqiy asoslarini belgilaydi va ularning O‘zbekiston yalpi ichki mahsulotidagi ulushini 2030-yilgacha 5 foizga yetkazishni maqsad qilgan. “Creative Incubator” innovatsiyalar, tajriba almashish va mutaxassislar bilan hamkorlik qilish uchun maydon yaratib, ushbu o‘zgarishlarning katalizatoriga aylanadi.

Ishtirokchilar uchun imkoniyatlar

“Creative Incubator” yosh mutaxassislar va startapchilarga o‘z g‘oyalarini rivojlantirish uchun barcha zarur imkoniyatlarni taqdim etadi:

• xalqaro va mahalliy ekspertlar ishtirokidagi ta’lim dasturlari va mahorat darslari;
• g‘oliblarga moliyaviy yordam ko‘rsatiladigan startap-tanlovlar;
• intensiv treninglar va yetakchi kompaniyalarga tashriflar;
• ishtirokchilar o‘z loyihalarini investorlarga taqdim etishlari mumkin bo‘lgan “Pitch Contest”.

Eng yaxshi startaplarni saralash

“Creative Incubator”da ishtirok etish uchun 79 ta loyiha taqdim etildi. Ulardan inkubatsiya dasturi doirasida qo‘llab-quvvatlanadigan eng yaxshi 15 tasi tanlab olindi. Ushbu startaplar o‘z g‘oyalarini rivojlantirish, ta’lim dasturlaridan o‘tish va loyihalarini yangi bosqichga olib chiqish uchun mentorlar bilan ishlash imkoniyatiga ega bo‘ladilar.

Logo Contest g‘olibini mukofotlash

Ochilish marosimining asosiy lahzalaridan biri “Creative Incubator” uchun eng yaxshi logotip tanlovi — “Logo Contest” g‘olibining taqdirlanishi bo‘ldi. Tanlov o‘zlarining kreativ g‘oyalarini taqdim etgan ko‘plab ishtirokchilarni jalb etdi. Natijada, “Creative Incubator”ning vazifasi va qadriyatlarini eng yaxshi aks ettiruvchi logotip g‘olib deb topildi. G‘olib dizayn muallifi, 19 yoshli iqtidorli frilanser dizayner Sardor Abdusamiyev esdalik sovg‘alari bilan taqdirlandi va uning ishi loyihaning rasmiy vizual ramziga aylanadi.

Loyiha hamkorlari

“Creative Incubator” loyihasi IT Park Uzbekistan, O‘zbekiston Madaniyat va san’atni rivojlantirish jamg‘armasi hamda “WIUT” hamkorligida amalga oshirilmoqda.

• IT Park Uzbekistan O‘zbekistonni xalqaro IT-habga aylantirib, mamlakat texnologik sanoatini rivojlantirishda yetakchi rol o‘ynamoqda. IT Park bir vaqtning o‘zida xorijiy kompaniyalarni jalb qilish orqali mahalliy kompaniyalarning global muvaffaqiyatiga faol hissa qo‘shmoqda. Bu esa o‘z navbatida aholining turmush darajasini yaxshilash, yangi ish o‘rinlarini yaratish va mutaxassislarimizning jahon bozoridagi raqobatbardoshligini oshirishga xizmat qiladi. “Creative Incubator” kabi loyihalarni amalga oshirish orqali IT Park startaplar va IT-kompaniyalarni doimiy ravishda qo‘llab-quvvatlab, ularga investitsiyalarni jalb qilish, xalqaro aloqalarni mustahkamlash, loyihalarni g‘oyalardan yirik biznesgacha kengaytirish va IT-mutaxassislarning yangi avlodini tarbiyalashga ko‘maklashadi.
• O‘zbekiston Madaniyat va san’atni rivojlantirish jamg‘armasi 2017-yilda Prezident Shavkat Mirziyoyevning qarori bilan tashkil etilgan. Jamg‘armaning vazifasi O‘zbekiston madaniyatini jahon madaniy makoniga integratsiya qilish, madaniyat muassasalarida inklyuziv va qulay muhit yaratish orqali mamlakat ichidagi imkoniyatlarni rivojlantirish, muzeylarni ta’mirlash, homiylikni rivojlantirish hamda muzeylar, teatrlar va boshqa madaniy muassasalarning kadrlar salohiyatini shakllantirishdan iborat. Jamg‘arma loyihalari bir necha yo‘nalishlarni qamrab oladi: san’at, adabiyot, teatr, musiqa, arxitektura, xoreografiya, kino. Fanlararo yondashuvni qo‘llash va turli mamlakatlar mutaxassislarini birlashtirish orqali Jamg‘arma MDH, Yevropa va Osiyo mamlakatlari o‘rtasida madaniy diplomatiyani rivojlantirishga hissa qo‘shadi.
• Toshkentdagi Xalqaro Vestminster universiteti yigirma yildan ortiq vaqt davomida ta’lim va innovatsiyalar sohasida yetakchi o‘rin egallab kelmoqda. 2002-yilda tashkil etilgan “WIUT” O‘zbekistonda oliy ta’lim sohasida yetakchi bo‘lib, akademik mahorat va innovatsiyalar standartlarini belgilaydi. “WIUT” o‘zini akademik ustunlikni mahalliy va xalqaro hamjamiyatda kreativ iqtisodiyotni rivojlantirishga hissa qo‘shadigan yorqin, istiqbolli muhit bilan birlashtirgan ijod markazi sifatida namoyon etdi.

“Creative Incubator”ning ochilishi O‘zbekistonning innovatsion ekotizimi uchun muhim voqeaga aylandi. Loyiha iste’dodlar, texnologiyalar va ta’limni birlashtirish orqali mamlakatning kreativ sanoatlari barqaror o‘sishi uchun mustahkam poydevor yaratmoqda. Kelajakda ishtirokchilarni yangi ta’lim dasturlari, tanlovlar hamda o‘z loyihalarini xalqaro miqyosga olib chiqish imkoniyatlari kutmoqda.