Toshkentda IT Education Forum boʻlib oʻtdi

26-oktabr kuni “ICTWEEK UZBEKISTAN 2023” uchinchi kuni doirasida xorijiy ekspertlar, mahalliy va xorijiy IT-kompaniyalar vakillarini birlashtirgan “IT Education Forum” boʻlib oʻtdi.

Tadbirdan koʻzlangan maqsad Oʻzbekistonda IT-taʼlimni rivojlantirish istiqbollarini targʻib qilishdan iborat.

Forum turli tanlov va nominatsiyalarda gʻoliblikni qoʻlga kiritgan yosh isteʼdod egalariga bagʻishlangan videorolik namoyishi bilan boshlandi. Oʻzbekiston Respublikasi raqamli texnologiyalar vaziri Sherzod Shermatov kirish nutqi bilan soʻzga chiqdi.

Forum davomida Raqamli texnologiyalar vaziri oʻrinbosari Rustam Karimjonov soʻzga chiqdi. Coursera bosh direktori Jeff Maggionkalda videomurojaat qildi, soʻngra Coursera vakili Siddxarta Nagar va boshqa maʼruzachilar taqdimot o‘tkazishdi. “Prezident Tech Award” tanlovi sovrindorlari motivatsion nutq soʻzladilar.

Shuningdek, forum doirasida ICPC dasturlash boʻyicha xalqaro talabalar olimpiadasining mintaqaviy bosqichi gʻoliblarini taqdirlash marosimi boʻlib oʻtdi, unda IT Park va ITPU tashkilotchi sifatida ishtirok etishdi, “Uzum” kompaniyasi esa tanlovning bosh homiysi boʻldi.

Chempionat 22-oktabr kuni Toshkent axborot texnologiyalari universitetida boʻlib oʻtdi. Olmaota shahrida oʻtkaziladigan xalqaro turnirning yarim final bosqichiga 15 ta jamoa yoʻllanma oldi.

Birinchi oʻrinni Toshkent axborot texnologiyalari universitetining “Code of Duty” jamoasi (Quvonchbek Umurzoqov, Miraqilov Davlatbek, Jamshidxon Qodirov), ikkinchi oʻrinni Moskva davlat universitetining Toshkent filiali “Awesome team” jamoasi (Rafael Ashrapov, Vyacheslav Shilov, Svyatoslav Kim), uchinchi oʻrinni Oʻzbekiston Milliy universitetining “3 idiots” jamoasi (Otabek Jurabekov, Diyorbek Tolibov, Ibrohimjon Mirgʻiyosov) egallashdi.

Jamoalar pul mukofotlari bilan taqdirlandi:

1-oʻrin — 60 million soʻm;

2-oʻrin — 40 million soʻm;

3-oʻrin — 20 million soʻm.

Taqdirlash marosimida IT Park bosh direktorining taʼlimni rivojlantirish boʻyicha oʻrinbosari Maxliyo Muksinova va “Uzum” kompaniyasining strategiya va M&A boʻyicha direktori Nikolay Seleznev ishtirok etdi.

Shuningdek, Maxliyo Muqsinova IT Park ijtimoiy tarmoqlarida ovoz berish yoʻli bilan tanlab olingan “Eng yaxshi 5 ta muvaffaqiyat tarixi” tanlovi gʻoliblarini taqdirladi.

Tadbir reper Konstaning chiqishi bilan yakunlandi.