Uzbekistan Connect: O‘zbekistonning texnologiya elchisi bo‘ling

O‘zbekiston global IT-habga aylanish ostonasida turibdi va uning eng asosiy ustunligi — mamlakatning ichida ham, tashqarisida ham faoliyat yuritayotgan yurtdoshlarimizdir. O‘zbekistonlik mutaxassislar allaqachon butun dunyo bo‘ylab texnologiya sohasida sezilarli yutuqlarga erishib, muvaffaqiyatli kompaniyalar tashkil etishgan, innovatsion loyihalarni amalga oshirishgan va xalqaro e’tirofga sazovor bo‘lishgan. Endi yangi tashabbus ushbu salohiyatni O‘zbekiston taraqqiyotiga yo‘naltirish va mamlakatni jahon IT-habga aylantirishga qaratilgan.    

“Uzbekistan Connect” — bu O‘zbekistonni global IT-habga aylantirishga ko‘maklashish maqsadida butun dunyodagi o‘zbek IT-mutaxassislarini birlashtirgan xalqaro hamjamiyatdir. Dastur O‘zbekiston IT sohasini rivojlantirishga hissa qo‘shishga tayyor bo‘lgan soha yetakchilari, investorlar va tadbirkorlarni jalb etadi.

Dasturning asosini Texnologiya elchilari tashkil etadi: xorijda muvaffaqiyatli karyera qurgan va O‘zbekiston bilan jahon bozorlari o‘rtasidagi aloqalarni mustahkamlashga tayyor bo‘lgan o‘zbek tadbirkorlari, investorlar va IT sohasidagi mutaxassislar, shuningdek, mamlakatning texnologik shakllantirishga bel bog‘lagan xalqaro ekspertlar.

Asosiy vazifalar

O‘zbekistonlik IT-mutaxassislarining global hamjamiyatini shakllantirish — xorijda faoliyat yuritayotgan tajribali o‘zbekistonlik mutaxassislar, tadbirkorlar va investorlarni mahalliy IT-ekotizim bilan birlashtirish. Dastur xalqaro va mahalliy ekspertlar o‘rtasidagi hamkorlikni mustahkamlash, bilim almashishni rag‘batlantirish, qo‘shma loyihalarni amalga oshirish va O‘zbekistonda texnologik innovatsiyalarni rivojlantirishga qaratilgan.

Yetakchi jahon IT-kompaniyalari va investitsiyalarini jalb etish — O‘zbekistonning xalqaro texnologiya korporatsiyalari va investorlar uchun istiqbolli yo‘nalish sifatidagi mavqeini oshirish. “Uzbekistan Connect” tashabbusi strategik hamkorliklar o‘rnatish, qulay siyosatni joriy etish va global sanoat yetakchilari bilan bevosita ishlash orqali mamlakatning raqamli transformatsiyasini jadallashtirish uchun sarmoya, tajriba va ilg‘or texnologiyalarni jalb etishga intilmoqda.

Startaplar uchun venchur moliyalashtirishni rivojlantirish — venchur investitsiyalaridan foydalanish imkoniyatini yaratish va biznes farishtalari tomonidan qo‘llab-quvvatlashni ta’minlash orqali O‘zbekistonning startap ekotizimini mustahkamlash. Dastur istiqbolli o‘zbek startaplari va xalqaro investorlar o‘rtasida aloqalar o‘rnatilishiga ko‘maklashadi, ularga global miqyosda kengayish va jahon bozorida raqobatlashish imkonini beradi.

Mentorlik va kasbiy o‘sish imkoniyatlarini taqdim etish — tajribali o‘zbekistonlik IT-mutaxassislar va biznes yetakchilarini yosh iste’dodlarga ustoz sifatida jalb qilish. “Uzbekistan Connect” tizimli mentorlik dasturlari, karyera bo‘yicha maslahatlar va asosiy ko‘nikmalarni rivojlantirish orqali yangi avlod IT-mutaxassislari va tadbirkorlarning shakllanishiga hissa qo‘shmoqda.

O‘zbekistonning yetakchi global IT-hab sifatidagi mavqeini mustahkamlash — mamlakatning jadal rivojlanayotgan texnologiya sohasini xalqaro maydonda faol targ‘ib qilish. Tashabbus ommaviy axborot vositalarida keng yoritish, global netvorking tadbirlarida ishtirok etish va strategik hamkorliklar o‘rnatish orqali O‘zbekistonning innovatsiyalar, iste’dodlar va raqamli biznes uchun imkoniyatlar markazi sifatidagi nufuzini oshirishga qaratilgan.

Ishtirokchilar uchun imkoniyatlar

• Rasmiy e’tirof — IT Park veb-saytida joylashtirilish va PR-ko‘mak.
• Eksklyuziv imkoniyatlar — sanoat yetakchilari, investorlar va davlat tuzilmalari bilan bevosita aloqalar.
• Tashabbuslarni moliyalashtirish — xalqaro delegatsiyalar uchun yiliga $10 000 gacha mablag‘.
• Sayohatlarni qo‘llab-quvvatlash — har yili O‘zbekistonga to‘liq xarajatlari qoplanadigan ikkita tashrif.
• Kuchli netvorking platformasi — O‘zbekiston IT sohasining yetakchi vakillari bilan har oylik uchrashuvlar.

 

 

Dastur jadvali

2025-yil mart — Arizalar qabuli boshlanadi.

2025-yil aprel — Elchilar tanlanadi.

2025-yil maydan — Elchilar faoliyati boshlanadi.

2025-yil 22-25-may — Toshkent va Samarqandda birinchi strategik uchrashuv:

Raqamli texnologiyalar vaziri va IT Park vakillari bilan uchrashuvlar, madaniy dastur.

IT-kompaniyalarga tashriflar, ishbilarmonlik aloqalari va strategik sessiyalar.

2025-yil sentyabr — elchilarimiz ishtirok etadigan birinchi asosiy tadbir — har yilgi “ICTWEEK Uzbekistan”.

Ishtirokchilarga qo‘yiladigan talablar

• IT, konsalting, investitsiya yoki tadbirkorlik sohasida kamida 5 yillik ish tajribasi.
• Har bir mamlakatdan 2-3 nafargacha vakil.
• Elchilarning har oylik uchrashuvlarida doimiy ishtirok etish.

Bizga qo‘shiling!

“Uzbekistan Connect” — bu O‘zbekiston rivojlanishiga hissa qo‘shish, ilg‘or resurslar va xalqaro imkoniyatlarga ega bo‘lish uchun noyob imkoniyatdir.

ARIZA TOPSHIRISH: forms.gle/cdVDvzEUcXsWxo8V7

O‘zbekistonning o‘zgarishi allaqachon boshlandi. Kelajakning bir qismiga aylaning!