“WorldSkills International” chempionatida O‘zbekiston nomidan IT Park jamoasi ishtirok etadi

8–12-sentabr kunlari Saransk shahrida “WorldSkills International” chempionatining Markaziy Osiyo bosqichi bo‘lib o‘tadi. “Mobil robototexnika” yoʻnalishi boʻyicha O‘zbekiston nomidan IT Park jamoasi ishtirok etadi. Ayni paytda IT Park jamoasi Qozon va Saransk shaharlarida professional mashgʻulotlarda qatnashmoqda va chempionatga tayyorgarlik ko‘rmoqda.

Bundan tashqari, 2022-yilning 12–13-oktabr kunlari Fransiyaning Bordo shahrida Mobil robototexnika bo‘yicha “WorldSkills International” 46-Xalqaro jahon chempionati boʻlib oʻtadi va u yerda mamlakatimiz nomidan IT Parkʼning yosh robototexniklari ishtirok etishadi.

Eslatib oʻtamiz, Oʻzbekiston “WorldSkills International” Assotsiatsiyasiga 2020-yilda aʼzo boʻlib, uning 83-aʼzosiga aylangan boʻlsa, 2022-yil mart oyida “Mobil robototexnika” yoʻnalishi boʻyicha ushbu chempionatning Respublika bosqichi boʻlib oʻtgan boʻlib, unda IT Park jamoasi ishtirok etgan edi. So‘ngra IT Park jamoasi 1-o‘rinni egalladi va shu tariqa chempionat yo‘llanmasini qo‘lga kiritdi.