Xitoy kompaniyalari vakillarining IT Park'ga tashrifi

Joriy yilning 11-may kuni Chongqing Zhizhuang Information Technology Co., Ltd. kompaniyasi direktori Jon Chjuan Chjungron va Wanghong Technology direktori Elyor To‘rayev IT Park Uzbekistan ofisiga tashrif buyurishdi.

Tashrifdan maqsad - axborot texnologiyalari sohasida ta’lim va biznesni rivojlantirish sohalarida hamkorlik imkoniyatlarini muhokama qilishdan iborat.

Mehmonlarni IT Park bosh direktori Farhod Ibragimov, IT Park direktorining birinchi o‘rinbosari Abdulahad Quchqarov, Investitsiyalar va xalqaro aloqalar bo‘limi boshlig‘i Nigora Mirjalilova va Eksport bo‘limi boshlig‘i Sultonmurod Rasulovlar kutib oldi.

IT Park vakillari tashkilot faoliyati bilan tanishtirib, maqsad va yutuqlariga to‘xtalib o‘tdilar. Mehmonlarga tashkilotning O‘zbekistonda IT-sanoatini rivojlantirishdagi o‘rni, rezidentlik dasturi, jumladan, u yerda ishlab chiqilayotgan kompaniya turlari va loyihalar haqida so‘zlab berildi.

Chongqing Zhizhuang Information Technology Co., Ltd. rahbari, o‘z navbatida, o‘z kompaniyasi va uning faoliyati haqida gapirib berdi. Uning ta’kidlashicha, tashkilotning Belarus, Makao kabi turli mamlakatlarda, shuningdek, Xitoyning uch xil mintaqasida vakolatxonalari mavjud.

Jon Chjuan Chjungron IT sohasida malakali kadrlar tayyorlash masalalari bilan qiziqdi. Xususan, IT kurslari, o‘qituvchilari va IT-mutaxassislari tayyorlanadigan platformalar haqida savollar berdi.

Uchrashuv yakunida tomonlar O‘zbekistonlik IT-mutaxassislari bilan qo‘shma loyihalar tashkil etishga kelishib oldilar.

Chongqing Zhizhuang Information Technology Co., Ltd. – bu katta ma’lumotlar, blokcheyn, sun’iy intellekt, aqlli dasturiy ta’minotni ishlab chiqish, apparat texnologiyalari va narsalar interneti sohasidagi tegishli texnologiyalar va ilovalarni tadqiq qilish va ishlab chiqishga ixtisoslashgan Xitoydagi ilmiy-texnologik korxona.