Yaponiyaga tashrif yakunlari: O‘zbekistonda IT-autsorsing va startaplar uchun yangi imkoniyatlar

13–18-oktyabr kunlari raqamli texnologiyalar vaziri Sherzod Shermatov boshchiligidagi O‘zbekiston Raqamli texnologiyalar vazirligi hamda bosh direktor Abdulahad Kuchkarov rahbarligidagi IT Park Uzbekistan delegatsiyalari Yaponiyaga rasmiy tashrif buyurishdi. Dastur Chiba shahrida o‘tkazilgan “CEATEC 2025: Innovation for All” xalqaro ko‘rgazmasida ishtirok etish, Osaka va Sapporo shaharlarida “Uzbekistan Outsourcing Session” taqdimot sessiyalarini o‘tkazish, shuningdek, Yaponiyaning yetakchi IT va kontent kompaniyalari vakillari bilan uchrashuvlarni o‘z ichiga oldi.

Ushbu tashrif IT Park Uzbekistan’ning xalqaro aloqalarni rivojlantirish va O‘zbekistonni IT-autsorsing hamda texnologik investitsiyalar uchun ishonchli platforma sifatida ilgari surish bo‘yicha strategik faoliyatining bir qismi bo‘ldi.

Tashrif yakunida hamkorlik bo‘yicha muhim kelishuvlarga erishildi. Yaponiya IT rivojlantirish agentligi (IPA) O‘zbekistonning IT-salohiyatini targ‘ib qilishga qaratilgan qo‘shma seminarlar o‘tkazishga tayyorligini bildirdi. “Ecraftman”, “Kushiro”, “NextOne” va “87Solution” kompaniyalari mamlakatda o‘z ofislarini ochish niyatida ekanliklarini ma’lum qildilar. Shuningdek, “Graphinica”, “Manga Culture”, “Techno Support Design”, “Hokkaido Intellect Tank”, “TaskDo” va boshqa kompaniyalardan autsorsing buyurtmalari olinishi kutilmoqda.

Bundan tashqari, Yaponiyaning 50 dan ortiq kompaniyasi hamkorlikka qiziqish bildirdi va ularning bir qanchasi bilan amaliy muzokaralar boshlandi.

CEATEC 2025: Yaponiyaning O‘zbekiston IT sohasiga qiziqishi

14-oktyabr kuni Tiba shahrida “CEATEC 2025” xalqaro ko‘rgazmasining birinchi kuni ochildi, unda IT Park Uzbekistan o‘z stendini taqdim etdi. Kun davomida ko‘rgazmaga 30 dan ortiq kompaniya vakillari tashrif buyurdi, ular orasida “Hitachi”, “Mitsubishi Electric”, “SCSK”, “IPA”, “Uzabase”, “Xacti” va boshqalar bor edi. Bundan tashqari, IT Park vakili O‘zbekiston IT sohasini rivojlantirishga bag‘ishlangan taqdimot o‘tkazdi, unda 40 dan ortiq xorijiy kompaniyalar ishtirok etdi.

“SCSK”, “Uzabase” va “Xacti” kompaniyalari yaqin kelajakda mahalliy IT-autsorsing bozorini batafsil o‘rganish uchun O‘zbekistonga kelish niyatini bildirdilar. Yaponiya IT rivojlantirish agentligi (IPA) bilan Yaponiya kompaniyalariga O‘zbekiston IT-ekotizimining imkoniyatlarini taqdim etadigan bir qator qo‘shma seminar va uchrashuvlar o‘tkazish bo‘yicha kelishuvga erishildi.

Ko‘rgazma davomida IT Park 40 ga yaqin muzokaralar o‘tkazib, O‘zbekistonni biznesni rivojlantirish uchun qulay platforma deb hisoblaydigan bir qator xorijiy kompaniyalar bilan aloqalar o‘rnatdi. Ular orasida “NAGASE”, “Sunflower TC Co., Ltd.”, “Collab”, “Shikumi Lab”, “Fortience Consulting” (NTT Data Group), “Energy Coloring”, “HEADLOCK Inc.” va “Agekke Group” kompaniyalari bor. Ularning ba’zilari O‘zbekistonda o‘z ofislarini ochish yoki mahalliy IT-kompaniyalar bilan hamkorlik qilishni rejalashtirayotganini ma’lum qildilar.

IT Park’ning “CEATEC 2025” ko‘rgazmasidagi ishtiroki yaponiyalik hamkorlarda katta qiziqish uyg‘otdi va O‘zbekiston IT-biznes va autsorsing uchun tobora jozibador yo‘nalishga aylanib borayotganini ko‘rsatdi.

Osaka: autsorsing va kontent ishlab chiqarishga qiziqish

15-oktyabr kuni IT Park Uzbekistan delegatsiyasi Osaka shahrida “Uzbekistan Outsourcing Session” taqdimot sessiyasini o‘tkazdi, unda Yaponiyaning 22 ta IT va kontent kompaniyalari ishtirok etdi. Ular orasida “Graphinica”, “87Solution”, “Manga Culture”, “Techno Support Design”, “LiveWell”, “Ryusenkyo Corporation”, “Knowledge on Demand”, “Noramatch”, “Stone System”, “Alaki” va boshqalar bor edi.

Sessiya davomida IT Park vakillari O‘zbekistonda IT-sanoatini rivojlantirish, davlat tomonidan qo‘llab-quvvatlash va soliq imtiyozlari, shuningdek, yapon va ingliz tillarini mukammal biladigan mutaxassislarni tayyorlash tizimi haqida batafsil ma’lumot berishdi.

Uchrashuv ishtirokchilari hamkorlikning uchta asosiy yo‘nalishiga alohida e’tibor qaratdilar. Ular Yaponiya hududlarida, jumladan, Osakada kadrlar tanqisligi sharoitida O‘zbekiston yosh IT-mutaxassislarning yuqori salohiyatini ta’kidladilar. Shuningdek, mamlakatda biznes yuritishning afzalliklari, jumladan, soliq imtiyozlari orqali mablag‘larni tejash masalalari muhokama qilindi.

Bundan tashqari, Yaponiya uchun an’anaviy bo‘lgan mamlakatlarda IT-xizmatlar narxining oshishi fonida O‘zbekistonning autsorsing sohasidagi imkoniyatlari ortib borayotgani qayd etildi.

Uchrashuv natijalari juda samarali bo‘ldi. “87Solution” kompaniyasi O‘zbekistonda o‘z ofisini ochishga va “One Stop Shop” xizmati yordamida ish boshlashga qaror qilganini e’lon qildi. Yana bir qancha kompaniyalar, jumladan, “Techno Support Design”, “Graphinica” va “Manga Culture” O‘zbekiston kompaniyalariga grafik dizayn va animatsiya buyurtmalarini berishga tayyorligini bildirdilar.

Sapporo: yangi hamkorlar va o‘yin loyihalariga qiziqish

17-oktyabr kuni IT Park Uzbekistan delegatsiyasi Sapporo shahriga tashrif buyurib, u yerda Yaponiyaning “Sega Corporation”, “Infiniteloop”, “DeNa Co.”, “Rocket Studio”, “Born Digital”, “Aiqve One” va boshqa o‘yin hamda kontent kompaniyalari bilan bir qator uchrashuvlar o‘tkazdi.

Uchrashuvlar davomida o‘yin sanoati sohasidagi hamkorlik istiqbollari muhokama qilindi. Yaponiyaning “Sega Corporation” va “Infiniteloop” kompaniyalari vakillari an’anaviy ravishda buyurtma beriladigan Vetnam va Xitoy kabi mamlakatlarda malakali kadrlar yetishmasligi va xarajatlarning oshib borayotganini ta’kidladilar. Shu nuqtai nazardan, O‘zbekiston o‘yin kontenti va dasturiy yechimlarni ishlab chiqarish uchun yangi, istiqbolli maydon sifatida ko‘rilmoqda.

O‘sha kunning o‘zida “Uzbekistan Outsourcing Session in Sapporo” nomli ikkinchi taqdimot sessiyasi bo‘lib o‘tdi. Unda “Ecraftman”, “TaskDo”, “Hokkaido Intellect Tank”, “Ciel Zero”, “Docon”, “Experis”, “Toyota Tsusho”, “Esplandia”, “Sapporo SDGs” va “Ikeuchi Group” kabi 23 ta kompaniya ishtirok etdi.

O‘zbekiston raqamli texnologiyalar vaziri maslahatchisi Akihiro Sakurai o‘z nutqida O‘zbekiston bilan hamkorlik tobora jozibador bo‘lib borayotganini ta’kidladi: mamlakatda biznes yuritish uchun qulay sharoitlar yaratilgan, xalqlarning madaniy yaqinligi esa ishonchli sheriklik munosabatlarini o‘rnatishga ko‘maklashmoqda.

Uchrashuvlar yakunida “Ecraftman” kompaniyasi “One Stop Shop” xizmati orqali O‘zbekistonda ofis ochish niyatini tasdiqladi. Shuningdek, “Hokkaido Intellect Tank”, “TaskDo” va “Ciel Zero” kompaniyalari o‘zbek IT-kompaniyalariga grafika va animatsiya yaratish bo‘yicha loyihalarni topshirishga tayyorligini bildirdi.

Muzokaralar va keyingi qadamlar

Tashrif yakunlariga ko‘ra, IT Park 50 dan ortiq yapon kompaniyalari bilan samarali aloqalar o‘rnatdi va ularning o‘ntasi bilan amaliy muzokaralarga o‘tish boshlandi — pilot loyihalar, yuridik ro‘yxatdan o‘tkazish va dasturchilar jamoasini tanlash masalalari muhokama qilinmoqda.

Ko‘plab kompaniyalar nafaqat IT-buyurtmalarni topshirish, balki O‘zbekistonda o‘z vakolatxonalari va qo‘shma korxonalarini ochishdan ham manfaatdor.

Yaqin kelajakdagi rejalar orasida “Ecraftman”, “Kushiro”, “NextOne” va “87Solution” kompaniyalarining ofislarini ochish ham bor. Bundan tashqari, “Graphinica”, “Manga Culture”, “Techno Support Design”, “Hokkaido Intellect Tank”, “TaskDo” va boshqa kompaniyalardan 2 million dollardan ortiq autsorsing buyurtmalari olinishi kutilmoqda.

Shuningdek, mamlakatning turli hududlarida IPA (Yaponiya IT rivojlantirish agentligi) bilan bir qator qo‘shma seminarlar tashkil etish rejalashtirilgan.

Osaka va Sapporoga tashrif natijalari shuni ko‘rsatdiki, yapon kompaniyalari O‘zbekistonga IT-autsorsing, o‘yinlar va raqamli kontent ishlab chiqarish uchun yangi platforma sifatida tobora faolroq qaramoqda.

IT Park Uzbekistan uchun bu nafaqat yangi hamkorlar va investitsiyalar, balki mamlakatning mintaqadagi ishonchli texnologiya markazi sifatidagi obro‘sini mustahkamlash yo‘lidagi muhim qadam bo‘ldi.