IT-Parkda TATU universiteti va litseyi talabalari uchun ekskursiya boʻlib oʻtdi

2020-yil 29-yanvar kuni IT-Parkda Muhammad al-Xorazmiy nomidagi Toshkent axborot texnologiyalari universiteti qoshidagi akademik litsey oʻquvchilari, shuningdek ushbu OTMʼning faol talabalari va Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi vakillari yigʻilishdi.

Mehmonlar IT-Park faoliyati bilan tanishdilar, taqdimot oʻtkazdilar va unda tashkilotning istiqbollari va kelgusidagi rejalari haqida soʻzladilar.

Talabalar IT-Parkning startapni yaratish, uni kengaytirish, jamoa aʼzolarini topish, investitsiyalarni samarali jalb qilish va izlash tajribalari bilan oʻrtoqlashgan inkubatsiya va akseleratsiya dasturlarining birinchi mavsumida ishtirok etgan startap-loyihalari bilan tanishdilar.

Axborot texnologiyalari va kommunikatsiyalarini rivojlantirish vazirining oʻrinbosari B.Olmatov yoshlarga bunday jadal surʼatlarda rivojlanib borayotgan dunyoda, yuqori texnologiyalarning nafaqat mahalliy, balki xalqaro IT-maydonda raqobatbardosh va istiqbolli boʻlishi uchun har kuni oʻzini oʻzi rivojlantirib borishi muhimligi haqida aytib oʻtdi.

Shunisi eʼtiborga loyiqki, talabalar IT-Parkning rezidenti hisoblangan, BPO (Business Process Outsourcing)ga ixtisoslashgan RevoTech kompaniyasi bilan ham tanishdilar. RevoTech vakillari kompaniya tomonidan kundalik hal qilinadigan biznes jarayonlari haqida gapirib berdilar, BPO boʻyicha mini-seminar oʻtkazdilar, shuningdek, rus, oʻzbek va ingliz tillarini mukammal bilishni talab etadigan ishga joylashish imkoniyatlari va xalqaro kompaniyaning asosi boʻlgan korporativ madaniyat haqida maʼlumot berishdi.