O‘zbekistondagi eng mashhur IT platformalardan birining integrasiyasi: u qanday ishlaydi?

AQSHdagi informatika fani bo‘yicha o‘quv dasturlarining yetakchi platformalaridan biri bo‘lgan Code.org endilikda “One Million Uzbek Coders” loyihasining o‘quv dasturiga kiritiladi.

Bu nimani anglatadi?

Bu endilikda O‘zbekiston yosh avlodi hamda boshqa IT sohasida faoliyat ko‘rsatishni xohlovchilar Code.org platformasi resurslaridan foydalanishlari va kelajak mutaxassisliklaridan birini mukammal o‘zlashtirishlari mumkinligini anglatadi.

Code.org xalqaro hamkorlik boʻyicha vitse prezidenti Leonardo Ortiz Villakorta oʻz videomurojaatida rasman Code.org “One Million Uzbek Coders” loyihasining bir qismiga aylanishini va u bolalarning kreativlik, mantiqiy va algoritmik fikrlash, muammolarni yechish va jamoada ishlash qobiliyati va boshqa kerakli koʻnikmalarini rivojlantirish orqali ularning potensialini oshirishga koʻmak berishini maʼlum qildi.

Leonardo Ortiz o‘z videomurojaatida IT Park, Dubai Future Foundation va boshqa tashkilotlar bilan hamkorlik qilish orqali O‘zbekistondagi maktab o‘quvchilariga informatika fanini o‘qitish bo‘yicha ta’lim kontentini yaxshilashga hissa qo‘shish mumkinligini aytdi.

Leonardo Ortiz Code.org platformasining O‘zbekistondagi rasmiy lokalizasiyasi va informatika fani asoslari bo‘yicha Code.org o‘quv dasturiga, shuningdek, 4 yoshdan 18 yoshgacha bo‘lgan yoshlar uchun 200 soatlik mashg‘ulotlarni tashkil qiluvchi «Hour of Code» va videodarslar seriyasiga o‘zbek tili kiritilganligi e’lon qildi.

“Men O‘zbekistondagi barcha ota-onalar va o‘qituvchilarni ushbu platformani o‘rganishga va barcha maktab o‘quvchilariga ushbu kontentni yetkazishni boshlashga chaqiraman”, - deya qo‘shimcha qildi Leonardo Ortiz.

Code.org – bu maktablarda kompyuter fanini oʻrganishni kengaytirishga qaratilgan notijorat tashkilot. Code.orgʼning maqsadi barcha maktablardagi har bir talaba kompyuter fanini asosiy taʼlimning bir qismi sifatida oʻrganish imkoniyatini berish. Code.org AQSHning eng yirik maktab okruglarida kompyuter fanlari boʻyicha oʻquv dasturlarining yetakchi provayderi. Bundan tashqari, ushbu platforma «Hour of Code» har yillik xalqaro kampaniyasi tashkilotchisi boʻlib, hozirgi kunda butun dunyodagi dunyo bo‘ylab milliarddan ortiq talabalarni jalb qilmoqda.

Code.org homiylari: Microsoft, Facebook, Amazon, Infosys Foundation, Google va boshqa IT giganlari.

«Code.org» platformasida 1 700 000 dan ortiq oʻqituvchi va 53 000 000 dan ortiq oʻquvchi roʻyxatdan oʻtkazilgan. 2019-yil kurslarning 70 000 dan ortiq bitiruvchisi ishga joylashishga muvofiq boʻlishgan.

Platformadagi barcha kurslar bepul va interaktiv formatda taqdim etiladi.

Platforma havolasi: http://code.org

Videomurojaatga havola: https://www.youtube.com/watch?v=SU-UgMrrkcU&t=7s