“Offshore Outsourcing Tour 2024” ishtirokchilari “Realsoft” kompaniyasiga tashrif buyurishdi

18-20 mart kunlari Toshkent va Samarqand shaharlarida Oʻzbekiston Raqamli texnologiyalar vazirligi va IT Park Uzbekistan hamkorligida tashkil etilgan “Offshore Outsourcing Tour 2024” xalqaro ITES tadbiri boʻlib oʻtmoqda.

Tadbirdan koʻzlangan asosiy maqsad xalqaro kompaniyalarga Oʻzbekistonning axborot texnologiyalari va autsorsing sohasidagi salohiyati, shuningdek, mamlakatga sarmoya kiritish uchun hukumat tomonidan yaratilgan imkoniyat va chora-tadbirlarni namoyish etishdan iborat.

18-mart kuni “Offshore Outsourcing Tour 2024” tadbiri qatnashchilari Oʻzbekistondagi yetakchi IT-kompaniyalardan biri, dasturiy ilovalarni ishlab chiqishga ixtisoslashgan “RealSoft” ofisiga tashrif buyurishdi. Ushbu kompaniya 20 yildan ortiq vaqt davomida faoliyat olib boradi hamda hozirgi kunda 200 dan ziyod ishchi mutaxassislariga ega.

“RealSoft” kompaniyasining investitsiyalar boʻyicha direktori Abdukarim Qodirov kompaniya faoliyati haqida taqdimot oʻtkazdi, unda oʻzining boy tajribasi va muvaffaqiyatli loyihalari haqida batafsil gapirib berdi. Mehmonlar, shuningdek, amalga oshirilgan IT-mahsulotlarni ishlab chiqish va qoʻllab-quvvatlash bilan shugʻullanuvchi boʻlimlarga tashrif buyurib, kompaniyadagi vazifalar qanday yo‘lga qo‘yilgani haqida tasavvurga ega boʻlishdi.

Tashrif davomida “RealSoft” vakillari tajriba va bilim almashish imkoniyatiga ega boʻldilar. Tashrif yakunlari boʻyicha xorijiy kompaniyalar va “RealSoft” vakillari hamkorlik va kelgusi sheriklik istiqbollarini muhokama qildilar.