Toshkent viloyatining Bo‘stonliq tumanida IT-maktab ochildi!

2022-yil 2-aprel kuni O‘zbekiston Respublikasi Prezidentining 2019-yil 6-oktabrdagi 4851-sonli qarori ijrosi doirasida Toshkent viloyatining Bo‘stonliq tumanida 2-sonli ixtisoslashtirilgan IT-maktab foydalanishga topshirildi.

Ochilish marosimida O‘zbekiston Respublikasi axborot texnologiyalari va kommunikatsiyalarini rivojlantirish vazirining birinchi o‘rinbosari Pekos Oleg Andreevich, Bo‘stonliq tumani hokimi Axmedov Jurabek Ilhomovich hamda IT-park direktorining innovatsiyalar bo‘yicha o‘rinbosari Rajabov Jahongir ishtirok etdilar.

Umumta’lim maktablaridan farqli o‘laroq, ixtisoslashtirilgan IT maktablarida matematika, ingliz tili va informatika fanlariga e’tibor qaratilgan o‘quv dasturi joriy qilingan. Bundan tashqari, IT maktablarida mobil robototexnika ham o‘qitiladi.

Maktab o‘quvchilarining axborot texnologiyalarini o‘rganishi uchun zarur qulay shart-sharoitlarni yaratish maqsadida maktab barcha zarur moddiy-texnik baza va yuqori tezlikdagi internet tarmog‘i bilan ta’minlangan. IT-Park qoshidagi IT markazlarining yuqori malakali o‘qituvchilari esa maktab o‘quvchilari uchun dasturlash va robototexnika bo‘yicha professional darslarni olib boradilar.

Oʻquv yili yakuniga qadar Oʻzbekistonda 85 ta ixtisoslashtirilgan IT-maktablarni ochish va ularning umumiy sonini 100 taga yetkazish rejalashtirilgan.