“Xiaomi” kompaniyasi O‘zbekistonni MDH bozorlariga chiqish imkonini beruvchi xizmat ko‘rsatish markazi sifatida ko‘rib chiqmoqda

IT Park Uzbekistan bosh direktori Abdulaxad Kuchkarov “Xiaomi” kompaniyasining biznesni rivojlantirish bo‘yicha direktori Wang Guifen boshchiligidagi delegatsiya bilan uchrashuv o‘tkazdi. Tomonlar MDH bozorlarida foydalanuvchilarga xizmat ko‘rsatish jarayonini O‘zbekistondan IT Park rezidentlari orqali global miqyosda kengaytirish mumkin bo‘lgan modelni muhokama qildilar. Shuningdek, o‘zbek kompaniyalari uchun buyurtmalar hajmini oshirish masalasi ham ko‘rib chiqildi.

Xiaomi — Xitoyning yirik texnologik kompaniyasi bo‘lib, smartfonlar, maishiy elektronika va “qlli uy” qurilmalarini ishlab chiqaradi, aqlli qurilmalar tarmog‘i va onlayn xizmatlarni rivojlantiradi hamda butun dunyo bo‘ylab hamkorlar va yetkazib beruvchilar bilan hamkorlik qiladi.

Ko‘p tilli mutaxassislar zaxirasi va O‘zbekiston hududlarining salohiyati muhokamaning asosiy mavzusiga aylandi. Kompaniya standartlariga mos ta’lim dasturlarini ishlab chiqish hamda o‘quv markazlarini tashkil etish imkoniyatlari ko‘rib chiqildi.

Joriy model alohida qayd etildi: “Xiaomi” mijozlarni qo‘llab-quvvatlash xizmatining bir qismini allaqachon hamkor kompaniya bajarib kelmoqda. Mazkur hamkor 2025-yil iyun oyida Toshkentda ilk aloqa markazini ochgan edi. Shu munosabat bilan tomonlar servis oqimlarini bosqichma-bosqich IT Park rezidentlari orqali markazlashtirishni — avval MDH bozorlarida, keyinchalik esa boshqa hududlarga kengaytirishni muhokama qildilar.

IT Park “Xiaomi” vakillarini mamlakatga tashrif buyurib, mavzuga oid muhokamalarni davom ettirishga taklif qildi. Kompaniya ushbu tashrifga qiziqish bildirganini ma’lum qildi.

Ushbu kelishuvlar ko‘p tilli mutaxassislarni jalb qilish hamda IT Park rezidentlari uchun buyurtmalar hajmini oshirish orqali “Xiaomi” kompaniyasining MDH bozorlariga yo‘naltirilgan autsorsing xizmatlarini O‘zbekistondan kengaytirishga yordam beradi. Bu esa IT sohasining eksport salohiyatini oshiradi, mamlakatning xalqaro texno-autsorsing uchun qulay maydon sifatidagi mavqeini mustahkamlaydi va yangi ish o‘rinlarini yaratishga xizmat qiladi. “Xiaomi” vakillari muzokaralarni davom ettirish uchun O‘zbekistonga tashrif buyurish taklifini qabul qildilar.