“El-yurt umidi” iste’dodlari IT Park Uzbekistan’ni tanlashmoqda

IT Park Uzbekistan jamoasiga yosh va istiqbolli mutaxassislarni jalb etishni davom ettirmoqda. Ushbu yozda tashkilotga 20 dan ortiq talaba qo‘shildi, ularning orasida “El-yurt umidi” jamg‘armasining 14 nafar stipendiati. Amaliyotchilar yetakchi xorijiy oliy o‘quv yurtlarida: “University of Arizona”, “Arizona State University”, “University of Birmingham”, “Stony Brook University”, “KAIST” (Koreya), “University of York” va “University of Warwick”.

“El-yurt umidi” jamg‘armasi O‘zbekiston Respublikasi Prezidenti huzuridagi Davlat xizmati agentligi qoshida malakali kadrlarni xorijda tayyorlash va qayta tayyorlash maqsadida tashkil etilgan. Dastur iqtidorli fuqarolarga dunyoning nufuzli universitetlari va tashkilotlarida o‘qish hamda amaliyot o‘tash imkoniyatini beradi. Shunda ular O‘zbekistonga qaytgach, iqtisodiyot va davlat sektorining ustuvor tarmoqlarini rivojlantirishga hissa qo‘shadilar.

Ishtirokchilarning bir qismi Toshkentdagi IT Park bosh ofisida, boshqa qismi esa Nukusdagi mintaqaviy ofisda amaliyot o‘tamoqda.  Barcha uchun ish o‘rinlari, mentorlik va IT-xizmatlar eksporti, startap ekotizimini va venchur tashabbuslarini rivojlantirish, rezidentlar monitoringi, xalqaro hamkorlik, PR va HR yo‘nalishlari bo‘yicha loyihalarda ishtirok etish imkoniyati yaratilgan. Amaliyot yakunida IT Park eng faol ishtirokchilarni keyinchalik ishga joylashtirish imkoniyatlarini ko‘rib chiqadi.

Bu yoz amaliyotga AQSh, Buyuk Britaniya va Koreya universitetlaridan talabalar qo‘shildi. Ishtirokchilarning yarmidan ko‘pi “El-yurt umidi” stipendiatlaridir. Ular startap ekotizimini rivojlantirish, rezidentlar monitoringi, PR, strategiya va tahlil bo‘limlarida, shuningdek, Nukusdagi IT Park mintaqaviy ofisida faoliyat yuritishdi.

Kelsinboyev Mashhurbek:
“Men Birmingem universitetida “Xalqaro munosabatlar va iqtisodiyot” yo‘nalishida ta’lim olmoqdaman. IT Park “SoftLanding” bo‘limidagi amaliyot men uchun ko‘nikmalarimni oshirish va mehnat bozorida yanada kuchliroq bo‘lish uchun ajoyib imkoniyatga aylandi. Murabbiyim vazifalarni batafsil tushuntiradi va amaliy maslahatlar beradi. Shu vaqt ichida kompyuter savodxonligimni sezilarli darajada oshirdim, bu ko‘nikma men uchun juda muhim.”

Sunnatbek Abdumalikov:
“Men IT Park’ni zamonaviy infratuzilmasi va qulayliklari, shuningdek, startaplarni rivojlantirish bo‘yicha kuchli dasturlari, xalqaro tajriba va aloqalar o‘rnatish imkoniyati tufayli tanladim. “SoftLanding” bo‘limida amaliyot o‘tamoqdaman: bu yerda juda yoqimli muhit, zamonaviy sharoit va moslashuvchan madaniyat mavjud.”

Mohidil Ergasheva:
“Hozirda Birmingem universitetida tahsil olmoqdaman. IT Park’da HR bo‘limida amaliyot o‘tamoqdaman. Men uchun bu nazariy bilimlarni amaliyotda qo‘llash, yirik tashkilotning ichki jarayonlari bilan tanishish va jonli, dinamik muhitda ishlash uchun noyob imkoniyatdir. Ayniqsa, jamoadagi muhit ilhomlantiradi: hamkasblarning qo‘llab-quvvatlashi va ishtiroki sezilib turadi, bu esa ishni nafaqat samarali, balki haqiqatan ham zavqli qiladi.”

Bunday amaliyot amaliy vazifalarni yechish va yosh mutaxassislarni jalb qilishga qaratilgan. IT Park dunyoning yetakchi universitetlari, ularning O‘zbekistondagi filiallari hamda yangi formatdagi ta’lim markazlarida olingan bilimlar mamlakat IT-sohasining kadrlar salohiyatini kuchaytiradigan haqiqiy mahsulot va xizmatlarga aylanadigan maydonga aylanmoqda.

IT Park Uzbekistan “El-yurt umidi” jamg‘armasi bilan hamkorlik qilishdan va yosh mutaxassislarni qo‘llab-quvvatlashdan mamnun. Ishonchimiz komilki, bunday tashabbuslar kuchli milliy IT-ekotizimni yaratishda va raqamli kelajak yetakchilarining yangi avlodi salohiyatini ro‘yobga chiqarishda muhim ahamiyat kasb etadi.