Fargʻonalik startapchilar Startup Choikhona Cup gʻolibiga aylandilar

3–5-may kunlari Tojikistonning Xoʻjand shahrida BMTTD va Tojikiston biznes inkubatori tashabbusi bilan tashkil etilgan “Startup Choikhona Cup” tanlovi boʻlib oʻtdi.

“Startup Choikhona Cup” Farg‘ona vodiysi startapperlari uchun mo‘ljallangan. Ham faol tadbirkorlar, ham biznes gʻoyalariga ega yangi boshlanuvchilar qatnashishlari mumkin.

Tanlov quyidagi yo‘nalishlar bo‘yicha o‘tkazildi:

•  sanoat uchun IT yechimlari;
•  raqamli sogʻliqni saqlash va tibbiy texnologiyalar;
•  taʼlim texnologiyalari;
•  qishloq xoʻjaligi va agrobiznesdagi texnologiyalar;
•  elektron tijorat va IT xizmatlari.

Tanlovda 15 ta shahar va tuman ishtirokchilari o‘z loyihalarini taqdim etish imkoniyatiga ega bo‘ldilar: Farg‘ona, Andijon, Namangan, Qo‘qon, Isfara, Konibodom, B.Gafurov, Xo‘jand, Spitamen, Ch.Rasulov, Devashtich, Guliston, Buston, Mastchoh, Asht. Oflayn tadbirlarda dastlabki tanlovdan oʻtgan 30 nafar ishtirokchi qatnashdi.

Tanlov natijalariga ko‘ra O‘zbekistonning quyidagi loyihalari g‘olib deb topildi:

• 1-o‘rin: AgroDoctor – qishloq xoʻjaligi uchun yangi usullar va xizmatlarni taklif qiluvchi fermerlar uchun raqamli platforma;
• 2-o‘rin: Helper call center – qariyalar va alohida ehtiyojga ega boʻlgan shaxslar uchun tez yordam chaqirishni osonlashtiruvchi qurilma;
• 3-o‘rin: Dehqonbaba.uz – qishloq xo‘jaligi mahsulotlari, meva-sabzavotlarni xarid qilish va sotish uchun onlayn platforma.

“Startup Choikhona Cup” g‘oliblariga esdalik sovg‘alari, kompyuter toʻplamlari va noutbuklar topshirildi.