ISIJ CUP 2023 olimpiadasi natijalari e’lon qilindi

1-iyuldan 7-iyulga qadar Xalqaro informatika maktabi ko‘magida ISIJ CUP 2023 oltinchi Xalqaro informatika kubogi onlayn tarzda tashkil etildi va unga dunyoning 13 ta davlatidan, jumladan Rossiya, Xitoy, Mo‘g‘uliston, Shri-Lanka, Suriya, Tunis, Kuba, Ozarbayjon, Belarus, Tojikiston, Qirg‘iziston, Turkmaniston, O‘zbekistondan o‘quvchilar ishtirok etdi.

Musobaqa butun dunyodan 250 nafar maktab o‘quvchisi va 87 nafar murabbiyni  jalb etdi. Olimpiada ishtirokchilari orasida O‘zbekistonning Jizzax, Namangan, Samarqand, Buxoro, Xorazm, Navoiy, Farg‘ona va Qoraqalpog‘iston kabi turli viloyatlari, shuningdek, Toshkent shahri va Toshkent viloyati vakillari ham qatnashdi.

Musobaqalar matematik informatika, algoritmlash va C++ dasturlash bo‘yicha o‘tkazildi. Olimpiadada butun dunyo bo‘yicha jami 22 ta jamoa ishtirok etdi, shundan 6 tasi O‘zbekiston sharafini himoya qildi.

Matematik tur yakunlariga ko‘ra “A” guruhida O‘zbekistondan 13 nafar ishtirokchi sovrindor, “B” guruhida esa 4 nafar ishtirokchi g‘olib, yana 5 nafar ishtirokchi sovrindor bo‘ldi.

“Koder” bo‘limida o‘tkazilgan bellashuvlarda “B” guruhidan 5 nafar ishtirokchi sovrinli  natija qayd etdi.

Marafonda o‘zbekistonlik maktab o‘quvchilari g‘oliblik uchun kurash olib borishdi va yakunda 22 ta sovrinli medalni qo‘lga kiritishdi:

· “B” guruhi – 5 ta oltin medal;

· “A” guruhi – 3 ta kumush medal;

· “B” guruhi – 3 ta kumush medal;

· “A” guruhi – 9 ta bronza medali;

· “B” guruhi – 2 ta bronza medali.

Estafetada 1 va 2-sonli jamoalar ikkitadan oltin medalni qo‘lga kiritdi. 4-raqamli jamoa bitta bronza medalini qo‘lga kiritdi. Finalda ishtirok etgan 87 nafar murabbiylar orasidan birinchi jamoa ustozi Shohrux Sa’dullayev kuchli o‘ntalikka kirdi.

 Ma’lumot uchun: Cup ISIJ 2023 informatika boʻyicha har yili oʻtkaziladigan xalqaro olimpiada boʻlib, u matematik informatika, algoritmlash va C++ dasturlash boʻyicha 5 turni oʻz ichiga oladi. Har yili o‘smirlar o‘rtasida informatika bo‘yicha xalqaro kubogi butun dunyodan eng yaxshilar bilan raqobatlashishga, tajriba almashishga va hamfikrlarni topishga tayyor bo‘lgan yuzlab ishtirokchilarni jalb qiladi.