IT Park direktori Samarqand yoshlari bilan uchrashdi

2022-yilning 3-fevral kuni IT Park direktori Farhod Ibragimov IT Park Samarkand direktori Sherzod Yusupov hamda IT Park rezidenti, “Najot Ta’lim” o‘quv markazi rahbari Temurbek Adxamov bilan birgalikda IT Park Samarkand filialiga va viloyatdagi IT-Markazlariga tashrif buyurdilar.

Tashriflar davomida rahbarlar IT-Markazlarning oʻquvchilari bilan suhbatlashdilar, hamda, rezidentni Samarqanddagi IT Park filiali faoliyati bilan tanishtirdilar.

Bundan tashqari, IT Park vakillari 800 kishiga mo‘ljallangan IT Parkʼning yangi filialini ochish masalasi ko‘rib chiqilayotgan Axborot texnologiyalari va kommunikatsiyalari kollejiga tashrif buyurishdi.

Ta’kidlash joizki, Samarqand viloyati axborot texnologiyalarini rivojlantirish bo‘yicha yetakchilardan biri hisoblanadi.  Bugungi kunga qadar Samarqand IT-Markazlarida 5191 nafar bitiruvchi taʼlim oldi, shundan: 4496 nafar – bitiruvchi kompyuter savodxonligi, 302 nafari – Frontend, 110 nafari – Android, 110 nafari – Graphic&Web Design, 69 nafari – mobil robototexnika, 56 nafari –Backend, 48 nafari – raqamlashtirish va IT-tadbirkorlik asoslari.

IT Parkʼning Samarqand filiali aholi soni bo‘yicha ikkinchi o‘rinda turadi. Qolaversa, Samarqand shahridan 271 530 kishi uzbekcoders.uz platformasida roʻyxatdan oʻtdi, shundan 141 479 nafar talaba ishtirok etish sertifikatiga ega boʻldilar, 100 278 kishi – bitiruvchiga aylandilar.