IT Park rezidenti mahalliy kompaniyalar aksiyalari savdosi uchun ilk mobil ilovani ishga tushirdi

IT Park rezidenti “Multicard Payment” IT-kompaniyasi “Silk Capital” MChJ investitsiya vositachisi bilan hamkorlikda O'zbekiston fond bozori bilan ishlash uchun birinchi mobil ilovasini ishga tushirdi.

Yangi mahsulotni ishlab chiqarish 2021–2023-yillarda kapital bozorini rivojlantirish dasturi doirasida amalga oshirildi, unga ko‘ra, Moliya vazirligi 2022-yil 10-maydan boshlab test rejimida “Toshkent” RFB yagona dasturiy-apparat kompleksining HTS/MTS veb-interfeysi bilan integratsiyalashgan va mahalliy emitentlarning aksiyalarini sotib olish va sotish imkonini beruvchi mobil ilovalarni ishga tushirishga ruxsat berdi.

"Multicard.Investments" innovatsion birja savdo xizmatidan foydalanish oson: oddiy foydalanuvchi uchun har doim ham tushunarli bo'lmagan murakkab birja terminalidan farqli o'laroq, ilova barcha kerakli tranzaksiyalarni oson va qulay tarzda amalga oshirish imkonini beradi.

Bitimlar “Toshkent” RFBning yagona dasturiy-texnik kompleksida amalga oshirilib, ilova foydalanuvchining o‘z akkauntiga kirishini osonlashtiradi.

Ilova qay tarzda ishlaydi?

Ro‘yxatdan o‘tgandan so‘ng brokerlik hisobvarag‘i ochiladi va foydalanuvchi ilovada “one click” orqali o‘z depo hisobini to‘ldirib, aksiyalarni sotib olishi mumkin.

Mijozlarni identifikatsiya qilish oflayn rejimda amalga oshiriladi, shuning uchun xizmat hozircha faqat Toshkentdagi mijozlar uchun mavjud. Depo hisobvarag'ini masofadan ochish to'g'risidagi nizom tartibga soluvchi idoralar tomonidan tasdiqlanganidan so'ng, butun mamlakat bo'ylab mijozlar ilovadan foydalanishi mumkin bo'ladi.

Dasturdagi mavjud xususiyatlar

• har bir kompaniya aksiyalarining holatini kuzatish qulayligi;

• taqdim etilgan ro'yxatdan kompaniyalarni tanlash imkoniyati;

• foydalanuvchi portfelidagi ulushlar qiymatining o‘sishi/kamayishi va joriy paytdagi brokerlik hisobidagi qoldiqni tahlil qilish;

• kirim-chiqim tarixini kuzatish.

Xizmatga ulangan Uzcard yoki Humo kartalari orqali brokerlik hisobini to‘ldirish mumkin.

Eslatib oʻtamiz, Qimmatli qogʻozlar markaziy depozitariysining maʼlumotlariga koʻra, 2022-yil 1-may holatiga koʻra, Oʻzbekistonda 627 ta aksiya emitentlari faoliyat koʻrsatib, chiqarilgan aksiyalarning nominal qiymati boʻyicha umumiy hajmi 162,3 trillion soʻmni tashkil etadi. Aksiyalarning 91,1 foizi davlat va xo‘jalik boshqaruvi organlari, 2,7 foizi xorijiy investorlar, 6,2 foizi boshqa investorlar (jismoniy va yuridik shaxslar) hissasiga to‘g‘ri keladi. Aksiyalarga ega bo'lgan jismoniy shaxslar soni 850 000 dan ortiq.