IT Park va Koreya kompaniyalari kreativ sanoat sohasida mutaxassislar tayyorlash uchun kuchlarini birlashtirmoqda

IT Park’da “IT Works Korea” bosh direktori Bek Byon Dju va “Korea Broadcast Engineers & Technicians Association” (KOBETA) raisi Kim Song Jun boshchiligidagi Koreya delegatsiyasi vakillari bilan uchrashuv o‘tkazildi.

Bu nima uchun muhim?

“IT Works” — Samarqandda ofisini ochgan IT Park rezident kompaniyasidir. Videomontaj bilan shug‘ullanuvchi bu kompaniyada 42 ta xodim mehnat qiladi. Xizmatlar eksporti Koreya va Yaponiyaga yo‘naltirilgan.

KOBETA — 1987-yilda tashkil etilgan Koreya televideniye muhandislari uyushmasi bo‘lib, tarkibiga 27 ta televideniye kompaniyasi kiradi.

Asosiy kelishuvlar

Uchrashuvda kompaniyalarning xalqaro loyihalariga videomontaj, kompyuter grafikasi, VFX va animatsiya sohasidagi o‘zbekistonlik mutaxassislarni jalb qilish imkoniyatlari muhokama qilindi. Kim Song Jun Koreya telekanallari uchun loyihalar ustida ishlagan o‘zbekistonlik mutaxassislar yuqori malaka namoyish etganini ta’kidladi. “IT Works Korea” xalqaro bozor uchun grafik dizayn, webtoon dizayni, videomontaj, VFX va animatsiya bo‘yicha kadrlar tayyorlash sohasida hamkorlik taklif etdi.

Xizmatlar eksportini rivojlantirish bo‘yicha direktor Mahliyo Muksinovaning yoshlarni zamonaviy video ishlab chiqarish va dizayn texnologiyalariga o‘qitish uchun Samarqandda grafik markaz tashkil etish g‘oyasi Koreya delegatsiyasida alohida qiziqish uyg‘otdi.

“Samarqand O‘zbekiston iste’dodlari va Koreyaning ilg‘or texnologiyalarini birlashtirgan haqiqiy kontent-xabga aylanishi mumkin,” — deya ta’kidladi Mahliyo Muksinova.

Tomonlar yaqin kelajakda IT Park Uzbekistan, “IT Works” va “KOBETA” o‘rtasida memorandum imzolashga kelishib oldilar, shundan so‘ng qo‘shma loyihani batafsil ishlab chiqish rejalashtirilmoqda.

Keyingi qadamlar

Potensial ikki tomonlama hamkorlik raqamli kontent sohasidagi o‘zbekistonlik mutaxassislar uchun yangi imkoniyatlar ochadi. Samarqandda grafik markazning tashkil etilishi nafaqat O‘zbekistonning xalqaro bozordagi mavqeini mustahkamlaydi, balki yosh iste’dodlarga Koreyaning yetakchi ekspertlari tajribasini o‘rganish imkonini ham beradi. Loyiha mamlakatning kreativ sanoatini rivojlantirishda muhim qadam bo‘lishi kutilmoqda.