IT Park yuzi: Ilhom Jo‘raev — ta’lim loyihalari bo‘limi bosh menejeri

Sizni IT Park Uzbekistan jamoasi bilan “IT Park yuzi” doimiy ruknida tanishtirishda davom etamiz. Ushbu sonda Toshkent axborot texnologiyalari universitetida telekommunikatsiya yoʻnalishi boʻyicha oʻqishni muvaffaqiyatli yakunlagan Ilhom Joʻrayevni taqdim etamiz.

Hozir Ilhom taʼlim loyihalari boʻlimida davlat tashkilotlari bilan ishlash boʻyicha bosh menejer lavozimida ishlab kelmoqda.

Qanday qilib IT Parkka kelib qoldingiz?

Men IT Park jamoasiga 2021-yilda mintaqaviy menejer sifatida qoʻshildim. Ushbu tashkilotning rivojlanish imkoniyatlarini koʻrganim sababli IT Park’ni tanladim. Bu yerda mutaxassis sifatida oʻsishim mumkinligini ham tushundim.

Hozirda ishim hujjatlar, loyihalar va davlat tashkilotlari bilan aloqa qilish bilan bogʻliq. Shuningdek, axborot texnologiyalari sohasida ishlash yoki oʻqish istagida boʻlgan odamlar bilan ham suhbatlar oʻtkazaman. Telekoʻrsatuvlarda qatnashaman, tadbirlar va xizmat safarlarini tashkil qilaman.

Nega aynan IT Park?

Men uchun IT Park mamlakatimizning porloq kelajagi ramzidir. Tashkilot IT sohasi rivojiga hissa qoʻshib, jamiyatimiz uchun muhim va qiziqarli loyihalarni yaratishda faol ishtirok etmoqda. Bu yerda Oʻzbekistondagi ijobiy oʻzgarishlar uchun yangi gʻoyalar va imkoniyatlar dunyoga keladi. Masalan, “One Million Uzbek Coders” (OMUC) loyihasi tufayli milliondan ortiq kishi turli yoʻnalishlarda bepul taʼlim oldi. Bu IT Park jamiyatimiz uchun muhim loyihalarni amalga oshirayotganiga yaqqol misoldir.

Men bu katta doʻstona oilaning bir qismi ekanligimdan xursandman. Boshida biroz qiyinchiliklarga duch keldim, lekin ular meni maqsad sari borishga undadi. Ishda hamkasblarim meni ilhomlantiradi. Doʻstona va ahil jamoamizda hamma bir-birini qoʻllab-quvvatlaydi. Ofisda ijobiy muhit, oʻzaro tushunish va qoʻllab-quvvatlash hukmronlik qiladi va bu muvaffaqiyatli va samarali ish uchun juda muhimdir.

Oʻzbekiston IT-sohasi haqida qanday fikrdasiz?

Oʻzbekiston IT texnologiyalarini rivojlantirish yoʻlidan bormoqda. Davlatimiz tomonidan IT sohasini rivojlantirish uchun sharoit, ushbu sohada koʻplab ish oʻrinlari yaratilayotganidan xursandman. Mamlakat IT-mutaxassislarini tayyorlashga faol sarmoya kiritmoqda, IT sohasiga ixtisoslashgan yangi taʼlim muassasalari ochilmoqda.

IT Park ushbu jarayonda muhim oʻrin egallaydi. Bu koʻplab rivojlanish va kasbiy oʻsish imkoniyatlarini taqdim etadi. Koʻpgina xorijiy kompaniyalar hamkorlik va investitsiyalar uchun IT Parkʼni tanlashlari bejiz emas.

Boʻsh vaqtingiz haqida

Men tabiat qoʻynida boʻlishni juda yaxshi koʻraman. Sevimli mashgʻulotlarimdan biri — togʻda sayr qilish. Doʻstlarimiz bilan birgalikda uzoq yoʻllarni oʻrganamiz, baland choʻqqilarni zabt etamiz va manzaralardan zavqlanamiz. Bu yurishlar menga har qanday qiyinchiliklarni yengib oʻtishni oʻrgatdi va ichki uygʻunlik olib keladi.

Shuningdek, sayohat qilishni va kino tomosha qilishni yaxshi koʻraman. Yangi joylar va tanishuvlar doimo quvonch bagʻishlaydi va dunyoqarashni kengaytiradi, kino esa insonga nafaqat dam olish va koʻngil ochish, balki boshqa olamlarga shoʻngʻish va turli xil his-tuygʻularni boshdan kechirishga imkon beradi.