mGovAward tanlovi doirasida Demo Day tashkil etildi
“Astrum” IT Akademiyasida mGovAward tanlovi doirasida Demo Day bo‘lib o‘tdi. Tadbir BAA bilan “davlat mobil ilovalarini rivojlantirish” yo‘nalishidagi hamkorlik doirasida tashkil etildi.
Demo Day tadbirida AKT vaziri o‘rinbosari Jamshid Egamberdiyev, IT Park direktori Farhod Ibragimov, BAA Hukumat ishlari vazirligi huzuridagi Davlat xizmatlari samaradorligini monitoring qilish departamenti rahbari Vidad Bin Braik, BAA Hukumat ishlari vazirligining katta tahlilchisi Abdulla Al Hammadiy ishtirok etdi.
Tadbir IT Park tomonidan O‘zbekiston Respublikasi Axborot texnologiyalari va kommunikatsiyalarini rivojlantirish vazirligi hamda BAA hukumati ko‘magida tashkil etildi.
Qayd etilishicha, mGovAward tanlovini o‘tkazishdan asosiy maqsad yoshlarning davlat bilan hamkorlikda ishlashga bo‘lgan qiziqishini oshirish va mobil davlat xizmatlarini rivojlantirish bo‘yicha yuqori sifatli yechimlarni ishlab chiqishdan iborat. Eng ilg‘or yechimlar davlat muassasalari tomonidan joriy etiladi.
Musobaqa finaliga 19 ta ilova yetib kelgan bo‘lib, Demo Day davomida ta’lim, sog‘liqni saqlash, turizm, transport va logistika, tadbirkorlik, ekologiya va toza energiya, moliya va soliq, qonunchilik kabi sohalarga oid IT-yechimlar hakamlar hay’ati a’zolari va keng auditoriyaga taqdim etildi.
Finalistlar ro‘yxati:
• Braille Recognition – smartfon kamerasi (maxsus uskunadan foydalanmasdan) olingan tasvirlardan Brayl shriftini tanib olish uchun mobil ilova;
• “Tahrirchi” – bu Android uchun bepul o‘zbek tili imlo tekshiruvi klaviaturasi. Quyidagi funksiyalarni o‘z ichiga oladi:
- imlo tekshirish (shu jumladan, Toshkent shevasi);
- so‘zlarni avtomatik to‘ldirish (so‘z oxirini oldindan tahmin qilib, muqobil qo‘shimcha taklif qilish);
- kirill-lotin va lotin-kirill yozuvida keyingi ildizni bevosita klaviaturadan tahmin qilish;
- Imlo xatolarini tekshirish;
• Lalu - Onalar maktabi - homilador ayollar va yosh onalar uchun ilova. Bu homiladorlik va bola parvarishi, shuningdek, ona va bolaning sog‘lig‘ini kuzatishga oid ishonchli ma’lumot almashish tizimi;
• MEDBOX - shifokorlar va bemorlar o‘rtasida onlayn muloqot uchun mobil ilova. Hujjat almashish, video qo‘ng‘iroq, uchrashuvlarni boshqarish va boshqalar kabi muhim xususiyatlarga ega. Ilova tufayli mavjud oilaviy shifokor bilan gaplashish, video/audio qo‘ng‘iroq orqali umumiy amaliyot shifokoridan maslahat olish, shifokor tanlash va mutaxassis vaqtiga ko‘ra qabulga yozilish mumkin. Bundan tashqari, unda mutaxassislarning profillarini, maqolalar va reytinglarni ko‘rish mumkin;
• Uhealth - salomatlikni yaxshilash va bemorning malakali shifokor bilan muloqotini soddalashtirishga qaratilgan ilova;
• Tillo Girl – bu ayollar salomatligi va xavfsizligi uchun mo‘ljallangan mobil ilova: zo‘ravonlik xavfi tug‘ilganda xavf ostida qolgan qiz tanlangan kontaktlarga SMS orqali manzilni jo‘natadi, eng yaqin avtobus bekatlari, dorixonalar, politsiya bo‘limi, shifoxonalarni topadi. Xavotir tugmasi olib tashlanganida, tanlangan kontaktlarga uning xavfsiz ekanligi va qayerda joylashganligi haqida xabar yuboriladi. Shuningdek, bu yerda qizlarning salomatligi bilan bog‘liq ma’lumotlarni topish mumkin;
• Metaverse Medic – tibbiyotga qiziquvchilar uchun o‘quv platformasi bo‘lib, platformadan foydalanib, inson tanasining qismlarini AR va 3D formatida ko‘rish mumkin;
• Robocontest.uz – foydalanuvchilarga dasturlash ko‘nikmalarini oshirish, bilimlarini kengaytirish va suhbatlarga tayyorgarlik ko‘rishga yordam beruvchi eng ilg‘or platformalardan biridir. Tizimda c++, python, java va boshqa zamonaviy dasturlash tillarini o‘rganish mumkin. Tizim, shuningdek, virtual simulyator va real qurilmalarda robototexnikani onlayn o‘rganish imkonini beradi;
• Don’t waste – foydalanuvchilar xarid qilish yoki xayr-ehson qilish uchun yaqin atrofda oziq-ovqat topishlari mumkin bo‘lgan ilova. Shuningdek, ular o‘z mahsulotlarini iste’mol qilish xavfsiz bo‘lgan taqdirda sotishlari yoki hadya qilishlari mumkin;
• Inson CRM (I-CRM) - ilova ko‘p sonli onlayn so‘rovlarni boshqarishga va ularni osonlik bilan qayta ishlash, tartibga solishga yordam beradi. Bundan tashqari, Inson CRM (I) aholi so‘rovlari bilan ishlaydigan ko‘plab davlat tashkilotlariga ma’lumotlarni samarali qayta ishlash imkonini beradi;
• HealthyMe - ilova onlayn tashxis uchun mo‘ljallangan bo‘lib, mukammal ishlab chiqilgan algoritmlar yordamida qurilgan. Tashxisdan so‘ng foydalanuvchi davolanish uchun dori-darmonlar ro‘yxatini olishi, shuningdek, shifokorlar qabuliga o‘z vaqtiga qarab yozilishi mumkin;
• Uzdevs – dasturlash bo‘yicha onlayn o‘quv platformasi. Uzdevs interaktiv va sodda dasturlash darslari, testlar, amaliy mashg‘ulotlar va boshqalarni o‘z ichiga oladi. Loyihaning asosiy vazifasi butun dunyo bo‘ylab dasturchilarning mutaxassis sifatida rivojlanishiga ko‘mak berish;
• MentorMe - bu mentorlarni (tajribali va bilimli mutaxassislar) shogirdlar (biror yo‘nalishda yetarlicha ko‘nikma, bilim yoki tajribaga ega bo‘lmaganlar) bilan ikkala tomon uchun samarali hamkorlikni (to’lov, tajriba) taqdim etishni nazarda tutuvchi platforma;
• Utour - O‘zbekistonda faoliyat yurituvchi gidlar - O‘zbekistonda gidlarni topish xizmati. Gidlar, tarjimonlar, haydovchilar, xizmatchilar va turoperatorlar maʼlumotlar bazasi. Xizmat foydalanuvchilarga O‘zbekistonda dam olishni o‘z istak va qiziqishlariga qarab rejalashtirish imkoniyatini beradi (faol dam olish, tarix, sarguzashtlar, milliy taomlar, xaridlar va h.k.);
• Wisdom dictionary - lug‘atda 120 000 dan ortiq so‘z va iboralar mavjud. Bu Oʻzbekistondagi eng koʻp soʻz va iboralarga ega yagona lugʻat;
• My Health vessels - ilova qon tahlili (koagulogramma) natijalarini olishga mo’ljallangan. Unga ko‘ra, individual ravishda ovqatlanish ratsioni (dieta), kunlik suv iste’moli va jismoniy faollik turi tanlanadi;
• Ekogram - ilova atrof-muhitga g‘amxo‘rlik qilish va buning uchun bonuslar olish imkonini beradi, ularni chegirmalarga yoki homiy-kompaniyalar tomonidan taklif qilinayotgan boshqa qulayliklarga almashtirish mumkin;
• MathTask Setagi - arifmetik va mantiqiy fikrlashni rivojlantiruvchi boshqotirma;
• Eko portal - ilova foydalanuvchilarga sog‘lom va tabiatga zararsiz turmush tarzini olib borishga yordam beradi.
G‘oliblar iyul oyining boshida taqdirlash marosimi davomida e’lon qilinadi.
Tanlov mukofot jamg‘armasi – $100 000:
1-o‘rin – $50 000;
2-o‘rin –$30 000;
3-o‘rin –$20 000.
Demo Day hamkori – “Astrum” IT Akademiyasi
Onlayn translyatsiya uchun havola:
2022-06-07