O‘zbekiston terma jamoasi FIRST Global Challenge xalqaro chempionatida 5-o‘rinni egalladi!

13–16-oktyabr kunlari Shveysariyaning Jeneva shahrida robototexnika bo‘yicha FIRST Global Challenge jahon chempionati bo‘lib o‘tdi va unda O‘zbekiston terma jamoasi ham ishtirok etdi.

FIRST Global Challenge — 2016-yilda Din Kamen tomonidan tashkil etilgan International First Committee Association xalqaro assotsiatsiyasi tomonidan tashkil etilgan har yili o‘tkaziladigan Olimpiya uslubidagi robototexnika musobaqasi. Olimpiadaning maqsadi – yoshlarda fan, muhandislik va kelajak texnologiyalariga qiziqishni rivojlantirishdan iborat. Ayni paytda ushbu chempionat robototexnika boʻyicha eng katta olimpiada hisoblanadi.

Olimpiadada har yili 160 dan ortiq mamlakatdan jamoalar ishtirok etadi. Bu yil dunyoning 180 mamlakatidan kelgan ishtirokchilar g‘alaba uchun kurashdilar.

Musobaqada O‘zbekistonni 5 nafar ishtirokchidan iborat jamoa himoya qildi: Muhammad Matchonov va Muhammad Soliyev (mobil robototexnika kursi boʻyicha IT Park Tashkent talabalari), Azamat Ruziyev va Shukurullo Sodiqov (Robots & Me o‘quv markazi, Buxoro), Asadbek Abdullayev (Software Engineering kursi boʻyicha Astrum IT-Academyʼning talabasi), shuningdek, mentorlar – Azamat Karaxanov (IT Park) va Safina Teshabayeva (IT-Akademiyasi Astrum).

Oʻzbekiston jamoasi pley-offga yoʻl oldi va eng yaxshi 8 ta jamoa qatoriga kirdi. Chempionat yakunida jamoamiz 5-o‘rinni egalladi, bu esa O‘zbekiston tarixidagi ushbu turnirdagi eng yaxshi natija hisoblanadi. Bundan tashqari, Yel universiteti tashabbusi bilan o‘tkazilgan “Best Skills” nominatsiyasida ishtirokchilarimiz g‘olib bo‘ldi.

Eslatib oʻtamiz, robototexnika boʻyicha First Global Challenge jahon chempionatida ishtirok etish uchun milliy saralash 3-sentyabr kuni Astrum IT-Academy da boʻlib oʻtdi. Keyin saralashda O‘zbekistonning 10 ta viloyatidan 50 dan ortiq ishtirokchi qatnashdi.  6–11-sentyabr kunlari milliy saralashda g‘olib bo‘lgan jamoa Qozog‘istondagi o‘quv-mashg‘ulot yig‘inlarida qatnashib, ichki chempionatda qatnashish, shuningdek, qozog‘istonlik hamkasblari tajribasini o‘rganish imkoniyatiga ega bo‘ldi.