“OTMdagi inkubatsiya markazlari” nima va ular nima uchun kerak?

Yaqin vaqtgacha talabalar oʻzlarining gʻoyalarini loyihaga aylantirish uchun maslahat va koʻrsatma berib boradigan startap platforma, mentor va murabbiylar yordamida ishlash imkoniyati yoʻq edi. Lekin, bugungi kunda IT Park va universitetlarning oʻzaro hamkorligi tufayli talabalar inkubatsiya markazlarida taʻlim olish imkoniyatiga ega boʻlishdi. IT Park va OTM tomonidan koʻrsatiladigan yordam tufayli, ular nafaqat oʻz gʻoyalari va loyihalarini amalga oshirishlari yoki ustoz, murabbiy va mutaxassislardan yordam soʻrashlari mumkin, balki startap ekotizimning oʻzida boʻlish va butunlay tadbirkorlik muhitini toʻliq his qilish bahtiga sazovor.

Davlatimiz rahbari Qashqadaryo viloyatiga tashrifi davomida iqtisodiyotning barcha sohalari va axborot texnologiyalari oʻrtasida sinergiya yaratish maqsadida OTMlar, ilmiy-tadqiqot institutlari va IT-Parklar oʻrtasidagi hamkorlikni kengaytirish toʻgʻrisida qaror qabul qildi.

Ushbu topshiriqdan soʻng, universitetlar yosh ixlosmandlarga oʻz gʻoyalarini innovatsion loyihalarga aylantirishda yordam beradigan inkubatsiya markazlarini tashkil etishga harakat qilishmoqda.

“Inkubatsiya markazi” nima?

IT Parkʼning bir yarim yillik faol faoliyati davomida Oʻzbekistonda koʻplab yoshlar hali kungacha «startap» nima ekanligi toʻgʻrisida asosiy tushunchalarga ega emasligi aniqlandi. Buni tuzatish maqsadida, IT Park oʻz faoliyatini tubdan boshlashga, shuningdek, nafaqat tashkil etilgan tadbirkorlar va yirik IT kompaniyalar bilan, balki tadbirkor boʻlish yoki yirik IT kompaniyalarga rahbarlik qilish istagida yurgan salohiyatli yosh va istiqbolli yoshlar bilan ishlashga eʻtibor qaratishga qaror qildi.

Shu tarzda, talabalar uchun moʻljallangan yuqori texnologiyali startap loyihalarni ishlab chiqish platformasi boʻlib xizmat qiladigan inkubatsiya markazlarini yaratish gʻoyasi paydo boʻldi.

“Inkubatsiya markazi”da talabalar nima oladi?

Inkubatsiya markazlar faoliyati doirasida talabalar uchun turli xil konsultatsiya, musobaqa, xakaton va seminarlar oʻtkaziladi. Shuningdek, universitet talabalarining inkubatsiya markazlarida vaqtini samarali va sifatli oʻtkazishiga yordam berish maqsadida, ular inkubatsiya dasturlari va ish joylari bilan taʻminlanadi.

Oliy oʻquv yurtlari qoshidagi inkubatsiya markazlari yoshlarga boshlangʻich ekotizim haqida asosiy va fundamental bilimlarni berish bilan bir qatorda, ularga oʻzlarini axborot texnologiyalari sohasida tadbirkor sifatida namoyon etishlariga yordam beradi. Shu tariqa, “startap” tushunchasi Oʻzbekistondagi biron bir talaba uchun begona boʻlmaydi.

Iqtisodiy tarmoqlar bilan IT sinergiyasi qay tarzda yaratiladi?

Barchamizga maʻlumki, iqtisodiyotning barcha sohalari axborot texnologiyalari, texnologik mahsulotlarni joriy etish va ular bilan oʻzaro bogʻliqlikka muhtoj. Bu nafaqat Oʻzbekistonga, balki butun dunyoga tegishlidir. Agar biz jahon tajribasini misol qilib qaraydigan boʻlsak, unda ishonch bilan aytishimiz mumkinki, IT mutaxassisi mustaqil ravishda iqtisodiyot, tibbiyot, turizm va boshqa yoʻnalishning xususiyatlarini qamrab ololmaydi. Innovatsion loyihani yaratish uchun “soha mutaxassisi + IT mutaxassisi” havolasidan iborat boʻlgan jamoa kerak.

Oʻzbekistonda bunday aloqani inkubatsiya markazlari orqali amalga oshirish mumkin. Bu yerda turli yoʻnalishdagi talabalar mavjud boʻlgan muammolar va ularning yechimini aniqlash, shuningdek, noyob texnologik loyihalarni yaratish maqsadida IT mutaxassislari va davlat idoralari vakillari bilan hamkorlik qilish imkoniyatiga ega boʻlishadilar.

Nimalar yaratildi?

Bugungi kunga qadar mamlakatimizning quyidagi oliygohlarida inkubatsiya markazlari ochildi: Toshkentdagi Turin politexnika universiteti, G.V. Plexanov nomidagi Rossiya iqtisodiyot universiteting Toshkent shahridagi filiali, Toshkent davlat iqtisodiyot universiteti, Toshkent shahridagi INHA universiteti va Toshkent shahridagi Amity universiteti. Hozirgi kunda ushbu markazlarda startap loyihalarni yanada rivojlantirish maqsadida faol ishlar olib borilmoqda.

Yaqin orada Toshkent moliya instituti, Muhammad al-Xorazmiy nomidagi Toshkent axborot texnologiyalari universiteti, Toshkentdagi Singapur menejmentni rivojlantirish instituti, Oʻzbekiston davlat jahon tillari universiteti, Toshkent shahridagi Vebster universiteti, shuningdek, Jahon iqtisodiyoti va diplomatiya universitetida inkubatsiya markazlarini ochilishi kutilmoqda.