Ozarbayjon delegatsiyasi IT Park’ga tashrif buyurdi

16-19-may kunlari Ozarbayjonning 16 nafar ishtirokchidan iborat delegatsiyasi amaliy tashrif bilan O‘zbekistonda bo‘ldi. Caspian Energy forumi doirasida Caspian Energy Club aʼzo kompaniyalari mamlakatimizning sarmoyaviy salohiyati va ishbilarmonlik muhiti bilan yaqindan tanishish maqsadida Oʻzbekistondagi koʻrgazmalar, sanoat parklari va korxonalariga tashrif buyurdi.

Ishchi tashrif doirasida Caspian Energy Uzbekistan boshqaruvchisi Tehron Aliyev va Energy for business boshqaruvchisi Rasim Mahmudov IT Park ofisiga ham tashrif buyurishdi.

Mehmonlarni IT Park direktori o‘rinbosari Jahongir Rajabov va IT Park investitsiyalar va xalqaro aloqalar bo‘limi boshlig‘i Nigora Mirjalilova kutib oldi.

Tashrifdan maqsad IT Park faoliyati bilan tanishish va O‘zbekistonda startap ekotizimini va IT-ta’lim sektorini rivojlantirish bilan bog‘liq masalalarni ko‘rib chiqishdan iborat.

Nigora Mirdjalilova tashkilot faoliyati bilan tanishtirib, maqsad va yutuqlari haqida so‘zlab berdi. U O‘zbekiston IT sanoatini rivojlantirishda IT Park faoliyati muhimligini alohida ta’kidladi.

Mehmonlarda IT Parkda ishlab chiqilayotgan ta’lim loyihalari, shuningdek, IT-sohasida kadrlar tayyorlash masalalari qiziqish uyg‘otdi. Ularga mavjud dasturlar, kurslar, onlayn va oflayn ta’lim haqida so‘zlab berildi hamda Coursera loyihasi va ITPU universiteti bilan tanishtirildi.

Uchrashuv davomida mehmonlarga O‘zbekistonda startap ekotizimini rivojlantirish va IT Parkda loyihalarni ishlab chiqayotgan rezident kompaniyalar haqida umumiy ma’lumotlar taqdim etildi. Rezidentlar uchun imtiyozlar va startaplarni rivojlantirish bo‘yicha savollar ko‘tarildi. Ishtirokchilar O‘zbekistonda IT sanoatini rivojlantirishda IT Parkning o‘rni, shuningdek, bu boradagi xalqaro hamkorlik imkoniyatlarini muhokama qildilar. Uchrashuv IT Park hududi bo‘ylab ekskursiya bilan yakunlandi.