Raqamli texnologiyalar xalqaro markazi to‘g‘risidagi qonun muhokamasida xalqaro va mahalliy huquqshunoslar ishtirok etmoqda

“Enterprise Uzbekistan” Raqamli texnologiyalar xalqaro markazi tashkil etishga tayyorgarlik ko‘rish doirasida yetakchi xalqaro va mahalliy yuridik firmalar, shuningdek, sohaga oid uyushmalar bilan uchrashuvlar o‘tkazildi. Asosiy e’tibor alohida huquqiy rejim, investitsiya kafolatlari va intellektual mulk himoyasini ta’minlaydigan huquqiy bazani ishlab chiqishga qaratildi.

Muhokamada “SteelRose Legal”, “Latham & Watkins” va “White & Case” yuridik firmalarining xalqaro ekspertlari ishtirok etdilar.

Shuningdek, IT Park Uzbekistan’da mahalliy yuridik maslahat kompaniyalari va sohaga oid uyushmalar, jumladan “Azizov & Partners”, “Vakhidov & Partners”, “ABACUS”, “SOLVO”, “GRATA”, “Black Swan Consulting” va O‘zbekiston patent vakillari uyushmasi vakillari bilan davra suhbati o‘tkazildi.

Bundan tashqari, “K&Y Partners” va “Settle Law Firm” bilan alohida uchrashuvlar bo‘lib o‘tdi.

“Raqamli texnologiyalar xalqaro markazi to‘g‘risida”gi O‘zbekiston Respublikasi qonuni loyihasi muhokamalarning asosiy mavzusiga aylandi. Uchrashuvlarda ko‘tarilgan asosiy masalalar quyidagilarni o‘z ichiga oldi:

• Maxsus huquqiy rejim — texnologiya kompaniyalari uchun soliq va bojxona imtiyozlarini o‘z ichiga olgan moslashuvchan sharoitlarni yaratish;
• Investitsiya kafolatlari — investorlarni huquqiy himoya qilish, shu jumladan milliylashtirishdan himoyalash va investitsiya nizolarini shaffof hal etish;
• Bojxona va soliq tartibga solish — Markaz rezidentlari uchun ma’muriy tartib-taomillarni soddalashtirish;
• Intellektual mulk — xalqaro standartlarga muvofiq patentlar, mualliflik huquqlari va texnologiyalarni himoya qilish mexanizmlarini ishlab chiqish;
• Shaxsiy ma’lumotlar va raqamli xavfsizlik — GDPR va boshqa xalqaro standartlarga mos keladigan me’yorlarni joriy etish;
• Moliyaviy tartibga solish — valyuta nazorati, raqamli aktivlar va chegaralararo operatsiyalar masalalari;
• Tartibga solish qumdoni — innovatsion yechimlarni sinovdan o‘tkazish uchun tajribaviy huquqiy muhit yaratish;
• Mehnat qonunchiligi — xorijiy mutaxassislarni ishga qabul qilish jarayonini soddalashtirish va xodimlar uchun huquqiy kafolatlarni belgilash;
• Arbitraj va nizolarni hal etish — Markaz doirasida mustaqil arbitraj mexanizmi va ixtisoslashtirilgan sud tizimini yaratish.

“Enterprise Uzbekistan” yetakchi yuridik firmalar va ekspertlar bilan faol hamkorlikni davom ettirmoqda, normativ-huquqiy bazani takomillashtirish orqali O‘zbekistonda xalqaro investorlar va raqamli iqtisodiyot uchun qulay shart-sharoitlar yaratishga intilmoqda.