Tojikiston OAV delegatsiyasi IT Parkʼga tashrif buyurdi

24-noyabr kuni Tojikiston jurnalistlaridan iborat boʻlgan delegatsiya IT Parkʼga tashrif buyurdi.

Mehmonlar IT Park faoliyati, mahalliy va xalqaro IT-kompaniyalarga beriladigan soliq imtiyozlari va preferensiyalari bilan tanishtirildi, shuningdek, IT-xizmatlari eksporti, IT-taʼlim sohasidagi loyihalar va respublikada IT-infratuzilmani rivojlantirish borasida erishilgan natijalar haqida soʻzlab berildi.

Shuningdek, delegatsiya vakillariga O‘zbekiston yangi mintaqaviy IT-xab sifatida shakllanishi haqida so‘zlab berildi, mamlakatimizda barcha zarur shart-sharoitlar mavjudligi va hukumat tomonidan ko‘rsatilayotgan qo‘llab-quvvatlash choralari ta’kidlandi. Shu tariqa, xalqaro standartlarga javob beradigan qonunchilik, zarur zamonaviy infratuzilma, soliq va bojxona imtiyozlari, shuningdek, IT sohasida ta’limni rivojlantirish va boshqa ko‘plab masalalar qayd etildi.

Bundan tashqari, mehmonlarga IT Parkʼning rezident kompaniyalar eksporti hajmi va rezidentlar sonini koʻpaytirish borasidagi muhim yutuqlari haqida soʻzlab berildi;  Respublikada IT bazalarini onlayn o‘qitish bo‘yicha keng ko‘lamli “One Million Uzbek Coders” loyihasi amalga oshirilgani haqida gapirib berildi, buning natijasida 2,503,060 kishi fundamental IT-taʼlimga ega bo‘ldi, ayollar va yoshlarni IT sohasiga jalb qilish va qo‘llab-quvvatlash bo‘yicha loyihalar amalga oshirildi.

Taqdimotning asosiy qismidan so‘ng mehmonlarga IT Park majmuasi bo‘ylab ekskursiya uyushtirildi. Xususan, xorijlik jurnalistlar “Aloqabank” va “AloqaVentures” binosida bo‘lib, ularga kompaniyalar tomonidan moliyalashtirilayotgan turli loyiha va dasturlar haqida so‘zlab berishdi. IT Park, “Aloqabank” tijorat banki va “Aloqaventures” venchur fondi tomonidan ishga tushirilgan “AloqaTech Lab” dasturi alohida qayd etildi. Bu uch oylik korporativ akselerator boʻlib, u ekspertlar yordamini, shuningdek, loyihalarni ishga tushirish uchun texnik, moliyaviy va marketing yordamini oʻz ichiga oladi.