Toshkent moliya institutida inkubatsiya markazi ochilishi boʻlib oʻtdi!

2020-yilning 4-dekabr kuni IT Park hamkorligida Toshkent moliya institutida inkubatsiya markazining ochilish marosimi boʻlib oʻtdi.

Ochilish marosimida IT Park direktori Farhod Ibragimov, OTM rektori Tulkin Teshabaev, institute qoshidagi inkubatsiya markazi koordinatori Nargiz Qosimov, shuningdek, “OSON” va “BILLZ” startaplari asoschilari Farhod Mahmudov va Rustam Hamdamovlar ishtirok etishdi.

Ochilish marosimi davomida “OSON” startapining asoschisi Farxod Mahmudov universitetlarda inkubatsiya markazlarini ochish tashabbusi haqida oʻz fikrlari bilan oʻrtoqlashdi, shuningdek, inkubatsiya markazlarining talabalar orasida startaplarning rivojlanishiga ta’siri haqida aytib oʻtdi.

Bundan tashqari, “BILLZ” loyihasi asoschisi Rustam Hamdamov startap nima ekanligi haqida qisqacha taqdimot qildi va oʻz loyihasini muvaffaqiyatli amalga oshirishni istagan har bir inson nimalarni boshidan kechirishi kerakligi haqida soʻzlab berdi.

Toshkent moliya instituti qoshidagi inkubatsiya markazining asosiy maqsadi - bu institutda startap ekotizimini rivojlantirish, innovatsion loyihalarga qobiliyatini namoyish etadigan iqtidorli talaba va magistrlarni aniqlash, shuningdek, innovatsion va tadbirkorlik gʻoyalarini tijoratlashtirish jarayonini tashkil etishdan iborat.

Eslatib oʻtish joizki, OTMlar qoshida inkubatsiya markazlarini ochishdan asosiy maqsad – bu iqtidorli yoshlar orasida yaratilayotgan innovatsion markazlar soni va sifatini oshirish. Oʻz navbatida, inkubatsiya markazi asl ilmiy-texnik gʻoyalarni amalga tatbiq etish, kichik innovatsion loyihalar boʻyicha faoliyatini samarali yuritishi uchun talabalarga zarur shart-sharoitlar yaratadi.

Bugungi kunga qadar mamlakatimizning quyidagi oliygohlarida inkubatsiya markazlari ochildi: Toshkent shahridagi Turin politexnika universiteti, G.V. Plexanov nomidagi Rossiya iqtisodiyot universiteting Toshkent shahridagi filiali, Toshkent davlat iqtisodiyot universiteti, Toshkent shahridagi INHA universiteti, Toshkent shahridagi Amity universiteti va Toshkent moliya instituti. Hozirgi kunda ushbu markazlarda startap loyihalarni yanada rivojlantirish maqsadida faol ishlar olib borilmoqda.

Yaqin kunlarda Muhammad al-Xorazmiy nomidagi Toshkent axborot texnologiyalari universiteti, Toshkent shahridagi Singapur Menejmentni Rivojlantirish Instituti, Oʻzbekiston davlat jahon tillari universiteti, Toshkent shahridagi Vebster universiteti, shuningdek, Jahon iqtisodiyoti va diplomatiya universitetida inkubatsiya markazlarining ochilishi kutilmoqda.